Erlendir ferða­menn greiddu með greiðslu­kortum sínum 9,3 millj­arða króna í apríl sem er 39,4 pró­sent hærri upp­hæð en í sama mán­uði í fyrra. Þetta kemur fram í til­kynn­ingu frá Rann­sókn­ar­setri versl­un­ar­inn­ar.

Líkt og und­an­farna mán­uði var hæsti útgjalda­lið­ur­inn greiðslur til inn­lendra ferða­skipu­leggj­enda vegna ferða um land­ið. Fyrir slíkar ferðir greiddu ferða­menn 2,5 millj­arða króna í mán­uð­inum sem er 113 pró­sent hærri upp­hæð en í apríl í fyrra. Þá jókst erlend korta­velta vegna gist­ingar um 37 pró­sent á milli ára. Erlend korta­velta í íslenskum versl­unum nam 1,2 millj­arði króna í apríl sem er 14 pró­sent vöxtur frá sama mán­uði í fyrra. Mestur vöxtur erlendrar korta­veltu í versl­unum var í gjafa- og minja­gripa­versl­un­um, eða sem nam 43 pró­sent­um, að því er segir í til­kynn­ing­unni.

„At­hygli vekur að í apríl var 15,3 pró­sent hærri greiðslu­korta­velta á hvern erlendan ferða­mann sem kom til lands­ins heldur en í apríl fyrir ári síð­an, ef miðað er við fjölda ferða­manna sam­kvæmt taln­ingu Ferða­mála­stofu í Leifs­stöð. Sviss­lend­ingar og Rússar eru þeir sem eyða mestu á hvern ein­stak­ling þegar borin eru saman þjóð­erni ferða­manna,“ segir í til­kynn­ing­unni.

1,1 millj­arður í bíla­leigur og bensín

At­hygl­is­vert er að greina ferða­máta erlendra gesta inn­an­lands þegar höfð er til hlið­sjónar velta greiðslu­korta eftir útgjalda­lið­um. Sam­kvæmt útgjalda­tölum virð­ast þeir ferða­menn sem ferð­ast á eigin vegum helst kjósa að ferð­ast í bíla­leigu­bíl­um. Næst hæstum upp­hæðum er varið í flug, í þriðja sæti eru rútu­ferðir og að lokum ferju­sigl­ing­ar.

Hæsta upp­hæðin vegna ferða­laga inn­an­lands í apríl var vegna leigu á bíla­leigu­bílum eða 863 millj. kr. Erlend korta­velta vegna elds­neytis­kaupa, sem ætla má að sé aðal­lega vegna akstur bíla­leigu­bíla, var 281 millj. kr. Sam­tals nam þessi upp­hæð því lið­lega 1,1 millj­arði króna í mán­uð­in­um.

Útlend­ingar greiddu með kortum sínum vegna flug­ferða hér á landi í apríl 272 millj. kr. Þá greiddu þeir 75 millj. kr. fyrir ferðir með hóp­ferða­bílum og 9 millj. kr. vegna ferju­sigl­inga. Hér eru almennt ekki með­taldar greiðslur vegna skipu­legra skoð­un­ar­ferða sem farnar eru með far­ar­stjórum eða svo­kall­aðar pakka­ferð­ir.

Sam­an­lögð korta­velta erlendra ferða­manna fyrstu fjóra mán­uði þessa árs var 38 pró­sent meiri en sömu fjóra mán­uði í fyrra.