Kvika banki vill ekki upp­lýsa um hverjir eigi B-hluta­bréf í bank­an­um. Það kemur fram í svari Sig­urðar Atla Jóns­son­ar, for­stjóra bank­ans, við fyr­ir­spurn Kjarn­ans. Ákveðið var á síð­asta aðal­fundi Kviku að B-hlut­haf­ar, sem sam­kvæmt upp­lýs­ingum Kjarn­ans eru að mestu starfs­menn bank­ans, myndu fá 525 millj­ónir króna í arð vegna síð­asta árs. A-hlut­hafar fá hins vegar enga arð­greiðslu.

Sig­urður Atli segir í svari við fyr­ir­spurn Kjarn­ans að allar upp­lýs­ingar sem bank­anum sé „skylt og heim­ilt að veita um hlut­hafa bank­ans er að finna á heima­síðu hans; kvika.is. Þar er að finna lista yfir alla hlut­hafa sem eiga meira en eitt pró­sent af hlutafé og upp­lýs­ingar um eig­endur í þeim til­vikum þar sem hlut­haf­inn er lög­að­il­i.“ Þegar fyr­ir­spurn Kjarn­ans um hverjir væru B-hlut­hafar í bank­anum var ítrekuð sagði Sig­urður Atli að Kvika gæti ekki veitt þær upp­lýs­ing­ar.

Á heima­síðu Kviku eru ein­ungis veittar upp­lýs­ingar um A-hlut­hafa. Þar er hægt að sjá hverjir eiga rúm­lega 90 pró­sent A-hluta­bréfa í bank­an­um. Tveir stærstu eig­end­urnir eru ann­ars vegar VÍS (21,83 pró­sent) og hins vegar Líf­eyr­is­sjóður versl­un­ar­manna (9,53 pró­sent). Þar á eftir koma stórir ein­stak­lings­fjár­fest­ar. Á meðal þeirra er félagið K2B ehf., sem er fjórði stærsti hlut­hafi bank­ans með átta pró­sent hlut. Það félag er í 100 pró­sent eigu Svan­hildar Nönnu Vig­fús­dótt­ur, stjórn­ar­for­manns VÍS, sem er líkt og áður sagði langstærsti eig­andi Kviku. Engar upp­lýs­ingar eru hins vegar á síð­unni um B-hlut­hafa bank­ans.

Arð­greiðslur höfðu áhrif á að sam­runa­ferli var hætt

Á síð­ari hluta árs­ins 2016 var til­kynnt um yfir­vof­andi sam­runa Kviku við fjár­mála­fyr­ir­tækið Virð­ingu. Skrifað var undir vilja­yf­ir­lýs­ingu þess efnis 28. nóv­em­ber í fyrra. Í aðdrag­anda sam­ein­ingar átti að lækka eigið fé Kviku um 600 millj­­­­ónir króna og greiða lækk­­­­un­ina til hlut­hafa bank­ans. Hlut­hafar Kviku áttu eftir sam­runa að eiga 70 pró­­­­sent hlut í sam­ein­uðu félagi og hlut­hafar Virð­ingar 30 pró­­­­sent hlut. Þann 28. mars síð­ast­lið­inn var til­kynnt um að stjórnir Virð­ingar  og Kviku banka hefðu tekið sam­eig­in­­lega ákvörðun um að slíta við­ræðum um sam­ein­ingu félag­anna.

Kristín Pét­urs­dótt­ir, stjórn­ar­for­maður Virð­ing­ar, sagði við RÚV að arð­greiðsl­urnar til B-hlut­hafa Kviku, hafi haft áhrif á ákvörð­un­ina um að slíta sam­runa­ferl­inu, en þó ekki úrslita­á­hrif.

Fjár­mála­eft­ir­litið kannar hvort arður sé kaup­auki

RÚV greindi svo frá því á þriðju­dag að Fjár­mála­eft­ir­litið væri að kanna hvort til­teknar arð­greiðslur úr fjár­mála­fyr­ir­tækjum væru í raun kaupaukar, en sam­kvæmt lögum eru kaupaukar til starfs­manna fjár­mála­fyr­ir­tækja veru­lega tak­mark­að­ir. Sem dæmi má nefna að Kvika mætti ekki greiða starfs­mönnum sínum 525 millj­ónir króna í kaupauka sam­kvæmt þeim lögum enda tak­marka þau kaupauka­greiðslur við það að vera fjórð­ungur af árs­tekjum hvers starfs­manns. Sig­urður Atli hefur neitað því opin­ber­lega að arð­greiðslur til B-hlut­hafa, sem eru aðal­lega starfs­menn bank­ans, sé leið til að kom­ast fram hjá lögum sem tak­marka kaupauka.

Í svari sínu við fyr­ir­spurn RÚV stað­festi Fjár­mála­eft­ir­litið að tekið hafi verið til skoð­unar hvort sér­stakar aðstæður valdi því að arð­greiðslur til ákveð­inna hlut­hafa­flokka í til­teknum fjár­mála­fyr­ir­tækjum hafi falið í sér kaupauka.