Arn­grímur Brynj­ólfs­son, 67 ára íslenskur skip­stjóri, er í haldi yfir­valda í Namibíu fyrir að hafa stundað ólög­legar veiðar í land­helgi lands­ins. 

Arn­grímur var leiddur fyrir dóm­ara í gær í Wal­vis Bay sem komst að þeirri nið­ur­stöðu að hann þyrfti að vera áfram í gæslu­varð­haldi þangað til að 100 þús­und dala trygg­ing yrði greidd fyrir hann, svo Arn­grímur gæti verið frjáls ferða sinna á meðan að beðið er eftir því að málið hljóti dóms­með­ferð. Hann þurfti auk þess að afhenda vega­bréfið sitt til namibískra yfir­valda.

Arn­grímur starf­aði um ára­bil fyrir Sam­herja en í frétt Namibian Broa­dcasting Cor­poration (NBC) af mál­inu kom ekki fram hvar hann starfar nú, eða hvort hann starfi enn fyrir Sam­herja. Í Við­skipta­blað­inu í dag kemur þó fram, í við­tali við Björgólf Jóhanns­son, tíma­bund­inn for­stjóra Sam­herja, að fyr­ir­tækið sé enn við veiðar í Namib­íu. Björgólfur stað­festi svo í sam­tali við mbl.issíð­degis að Arn­grímur sé skipt­stjóri á Heina­ste, verk­smiðju­tog­ara sem Sam­herji gerir út í Namib­íu. Þar sagði Björgólfur þó að Arn­grímur væri í far­banni, ekki í gæslu­varð­hald­i. 

Auk Arn­gríms er rúss­neskur skip­stjóri, Iurri Fest­i­son, í haldi yfir­valda í Namibíu fyrir ólög­legar veiðar af sama tog­i. 

Á þriðju­dag í síð­ustu viku opin­ber­uðu Kveikur og Stundin hvernig við­skipta­hættir Sam­herja í Afr­íku, nánar til­tekið í Namib­íu, hefðu verið á síð­ustu árum á meðan að fyr­ir­tækið náði undir sig mjög verð­mætum hrossa­makríl­skvóta í land­inu. Það var gert með mútu­greiðslum til tveggja ráð­herra í land­inu og ann­arra manna úr þeirra nán­asta hring. 

Opin­ber­unin byggði ann­ars vegar á tug­þús­undum skjala og tölvu­pósta sem sýndu við­skipta­hætt­ina svart á hvítu, og hins vegar á frá­sögn Jóhann­esar Stef­áns­son­ar, fyrr­ver­andi verk­efna­stjóra Sam­herja í Namib­íu, sem ját­aði á sig fjöl­mörg lög­brot og sagð­ist hafa framið þau að und­ir­lagi Þor­steins Más og Aðal­steins Helga­son­ar, sem var lengi yfir útgerð Sam­herja í Afr­ík­u.