Skuldaleiðréttingin var notuð til að smala neytendum í viðskipti við einkafyrirtækið Auðkenni sem hefur einokunarstöðu í útgáfu rafrænna skilríkja. Auk þess var fyrirtækjum þröngvað í viðskipti við fyrirtækið, innleiðingarferli rafrænna skilríkja illa undirbúið og það hafði neikvæð áhrif á frjálsa samkeppni. Í ljósi þeirrar yfirburðarstöðu sem hin öfluga smölun viðskiptavina, með dyggri aðstoð ríkisvaldsins, hefur skilað Auðkenni getur fyrirtækið rukkað mun hærra verð fyrir þjónustu sína en aðrir sem bjóða upp á rafræn skilríki. Þetta segir Ólafur Stephensen, framkvæmdastjóri Félags atvinnurekenda, í grein í Morgunblaðinu í dag.
Neytendur munu á endanum borga
Auðkenni er fyrirtæki sem er í eigu Símans, Teris, Arion banka, Íslandsbanka og Landsbanka. Þeir neytendur sem nýttu sér skuldaleiðréttingu ríkisstjórnarinnar þurftu að verða sér úti um rafræn skilríki til að geta samþykkt hana. Til að byrja með voru skilríkin, sem fólk getur notað í farsímum sínum, ókeypis en Auðkenni hefur síðan gefið út að fyrirtækið ætli að rukka fyrir þau. Neytendur verða ekki rukkaðir beint heldur verður lagt gjald á þau fyrirtæki sem þurfa að bjóða viðskiptavinum sínum, meðal annars fjarskiptafyrirtæki sem eru í samkeppni við einn eiganda Auðkennis, Símann.
Ólafur segir í grein sinni að það blasi því við að neytendur muni bera sjálfir kostnaðinn af útgáfu og notkun skilríkjanna. „Athyglin hefur einkum beinzt að því að neytendum hafi, í krafti loforðs um skuldaleiðréttingu, verið smalað í viðskipti við einkafyrirtæki sem í raun hefur einokunarstöðu í útgáfu rafrænna skilríkja. Ferlið er þó ekki síður gagnrýni vert vegna þess hvernig fyrirtækjum var þröngvað í viðskipti við Auðkenni, hversu illa ferlið var undirbúið og hversu neikvæð áhrif það hefur á frjálsa samkeppni.“
Gengið til samninga án útboðs
Auðkenni hefur ekki einkarétt á útgáfu rafrænna skilríkja en önnur fyrirtæki sem átt hafa slíkar lausnir tilbúnar fengu ekki að bjóða í uppsettningu þeirra í tengslum við skuldaleiðréttinguna, en í gegnum hana hefur orðið lang mest aukning notenda rafrænna skilríkja. Þess í stað var gengið til samninga við Auðkenni og Advania um þá framkvæmd án útboðs.
Af hálfu Auðkennis hafa bæði verið í boði rafræn skilríki í snjallsíma og á plastkortum. Ólafur rifjar upp að við framkvæmd skuldaleiðréttingarinnar hafi komið í ljós að plastkortin virkuðu ekki sem skyldi hjá þeim tugum þúsunda netnotenda sem nota netvafra frá Apple; ekki var hægt að nota þau til að samþykkja skuldaleiðréttinguna af því að rafræna undirskriftin virkar ekki. „Þetta staðfestu tæknimenn ríkisskattstjóra. Auðkenni bauð jafnframt upp á sjálfsafgreiðslu fyrir skilríki á síma á vefnum. Sú þjónusta virkar ekki hjá þeim sem nota stýrikerfi frá Apple. Fyrir utan þau óþægindi sem þetta olli neytendum er það að sjálfsögðu samkeppnishindrun gagnvart söluaðilum Apple-vara þegar torveldara er fyrir notendur þeirra að nálgast opinbera þjónustu rafrænt en notendur tækja keppinautanna.
Símafyrirtækjunum var af hálfu ríkisskattstjóra og fjármálaráðuneytisins gert að búa kerfi sín undir innleiðingu rafrænu skilríkjanna með afar skömmum fyrirvara. Höfum í huga að í þeim hópi voru keppinautar Símans, eins af eigendum Auðkennis, sem hafði haft nægan tíma til að prófa tæknilausnina í samstarfi við fyrirtækið. Fjarskiptafyrirtækin þurftu að leggja í gríðarlegan kostnað við að skipta út SIM-kortum viðskiptavinanna til þess að þeir gætu nýtt sér skuldaleiðréttinguna. Nova ehf. þurfti að skipta um framleiðanda SIM-korta með ærinni fyrirhöfn og skömmum fyrirvara.
Að minnsta kosti af tveimur ástæðum er þetta samkeppnishindrun. Annars vegar er símafyrirtæki í raun stillt upp við vegg og því sýnt fram á að það eigi á hættu að missa viðskiptavinina annað ef það býður ekki »ríkislausnina« á rafrænni auðkenningu og undirskrift. Um leið er viðskiptavinum farsímafyrirtækja torveldað að skipta um símafyrirtæki. Til þessa hefur verið lagt upp úr því að númeraflutningur sé einfaldur og geti átt sér stað á nokkrum mínútum. Viðskiptavinur, sem hefur fengið rafræn skilríki og vill skipta um símafélag, þarf hins vegar að gera sér ferð í bankann og láta endurvirkja rafrænu skilríkin á símanum sínum. Þetta hindrar samkeppni á farsímamarkaði.“
Erfitt að senda reikninga til þeirra sem eru með frelsiskort
Auðkenni gaf nýverið út gjaldskrá þar sem boðað er að fjarskiptafyrirtæki verði rukkuð um 136 krónur á mánuði fyrir hvern viðskiptavin sem er með rafræn skilríki.
Ólafir segir að í ákafanum við að safna viðskiptavinum undir leiðréttingarpressunni virðist Auðkenni hafa látið það sér í léttu rúmi liggja þótt til dæmis Nova hafi ekki treyst sér til dæmis ekki til að undirgangast samningsskilmála um gjaldtöku af félaginu og þar með eftir atvikum af viðskiptavinum þess. „Nova benti á að stór hluti viðskiptavina símafélagsins væri með svokölluð frelsiskort og fengi enga reikninga. Hvernig á símafélag að rukka slíka viðskiptavini fyrir rafræn skilríki? Er hægt að ætlast til að það beri kostnaðinn af þeim sjálft?
Það virðist að flestu leyti eðlilegra að viðskiptasambandið sé á milli áskrifanda rafrænu skilríkjanna og Auðkennis sjálfs. Viðskiptavinurinn fengi þá reikning frá Auðkenni og fyrirtækið leigði pláss á SIM-kortum fjarskiptafyrirtækjanna. Viðskiptavinurinn er vafalaust reiðubúinn að greiða fyrir þessa þjónustu ef hann sér hagræði og þægindi í henni. Það er að minnsta kosti fráleitt að bankarnir, sem með rafrænum skilríkjum hafa sparað sér kostnað vegna auðkennislykla handa viðskiptavinum sínum, velti honum beina leið yfir á fjarskiptafyrirtækin.
Í gjaldskrá Auðkennis er sömuleiðis boðað að þjónustuveitendur, þ.e. fyrirtæki og stofnanir sem nýta lausn fyrirtækisins til að láta viðskiptavini sína auðkenna sig, verði rukkaðir um 500.000 krónur á mánuði fyrir þjónustuna. Það er miklu hærri upphæð en keppinautar Auðkennis bjóða sumir hverjir fyrir svipaða þjónustu, en gjaldskráin er hugsanlega sett fram í trausti þess að fyrirtækið hafi þegar náð yfirburðastöðu í krafti hinnar öflugu smölunar viðskiptavina til þess með dyggri aðstoð ríkisvaldsins.“
Ólafur beinir að lokum fjórum spurningum til Auðkennis og eigenda þess:
- Hvað mun kosta fyrirtæki og stofnanir að nýta sér möguleika á auðkenningu viðskiptavina? Eru sex milljónir á ári hið raunverulega verð?
- Hvernig hyggst Auðkenni semja við fjarskiptafyrirtæki vegna áskrifenda í fyrirframgreiddri þjónustu?
- Stendur til að áskrifandinn eigi skilríkin og geti haft þau með sér á milli símafyrirtækja með einfaldri tilkynningu, t.d. á vef Auðkennis?
- Munu bankarnir opna fyrir fleiri auðkennislausnir en frá sínu fyrirtæki í heimabönkum sínum?
