Stefán Pálsson og Nína Richter taka fyrir óvenjuleg málefni í óvenjulegum þætti sem er að vissu leyti óður til sjónvarpsþáttanna bresku QI, sem Stephen Fry gerði fræga. Hver þáttur hefur sinn bókstaf, sem er upphafsstafur þeirra málefna sem rædd eru í þættinum. Hvor þáttarstjórnandinn velur sér eitt málefni til að fjalla um en síðan tengjast málefnin einnig á óvæntan hátt. Þátturinn er í senn fróðlegur og fáránlegur, og geta hlutföllin þar á milli sveiflast til.
Um þennan tiltekna þátt
Fyrsti þátturinn er A og fjallar um Andskotann og Agúrkur. Við ferðumst um víðan völl, snertum á baráttunni gegn heimshryggðinni, tölum um fisk í raspi, fyrstu gróðurhúsin og óvenjuleg ofskynjunarlyf. Samkvæmt lögmálinu batna þættirnir eftir því sem á líður þannig að þessi þáttur er sá versti í röðinni.
Um þáttastjórnendur
Stefán Pálsson sagnfræðingur er fyrir löngu orðinn þjóðþekktur sem spurningahöfundur og samfélagsrýnir.
Nína Richter er fædd árið 1986. Hún er uppgjafar-sagnfræðinemi, dagskrárgerðarkona og handritshöfundur. Hún gaf út stutta skáldsögu árið 2006 sem náði takmörkuðum vinsældum og fékk hvorki umfjöllun heima né erlendis. Hún vann hins vegar fyrsta Fernuflugið, ljóðasamkeppni Mjólkursamsölunnar árið 2001, þá fimmtán ára gömul. Hún er útskrifuð frá Kvikmyndaskóla Íslands með gráðu í handritagerð og leikstjórn. Hún er með vikuleg innslög í Lestinni á Rás 1 um sjónvarpsþætti, auk þess að sinna þátttöku í ýmsum kvikmynda- og viðburðatengdum verkefnum.
Þau eru bæði á Twitter. Nína er @kisumamma og Stefán er @stebbip. Þátturinn hefur einni fengið sinn eigin reikning: @stafrofid. Ef fólk vill hafa samband, kvart yfir þáttastjórnendum eða koma með ábendingar um sniðug umfjöllunarefni þá er Facebook-síða þáttarins hér á /rofidhladvarp.
