Smám saman verður takturinn sem Framsóknarflokkurinn marserar við að fasískum trommuslætti. Fyrst átti að gera fána og skjaldamerki hátt undir höfði. Efla hér dug og þor, samkennd, samheldni og allskonar aðra rotnandi, þjóðernissinnaða, síðrómantíska hluti sem rænt hafði verið beint upp úr gröfum Fjölnismanna.
Síðustu misseri hefur svo heiftarleg ósamvinnuþýðni við fjölmiðla verið mest áberandi. Ítrekaðar, augljósar tilraunir til þöggunar, sem virka svolítið eins og „sie wollen einen totalen Krieg“ við alla þá umfjöllun sem samrýmist illa heimsmynd flokksins.
Og þar finnum við i fremstu víglínu valkyrjuna Vigdís Hauksdóttur. Hún „missir“ út úr sér hótunina, viljandi eða í einfeldni, um að hún sé með höndina á krananum. Tilbúin að skrúfa fyrir flæði fjár til þeirra stofnana sem hún persónulega kann illa við. Svo stendur hún við það.
Froðudiskó í dulargervi vefmiðils
Fjölmiðlafulltrúi ríkisstjórnarinnar gagnrýnir Grapevine fyrir umfjöllun blaðsins um króníska fjarveru kvíðasjúka forsætisráðherrans okkar.
Björn Ingi Hrafnsson, áróðursmálaráðherra Framsóknar, sölsar svo undir sig hið mjög svo óþæga og kjaftfora blað DV, til þess að jarða það í kirkjugarðinum, þar sem allir fréttamiðlar Björns Inga hvíla. Enn eitt andvana froðudiskó í dulargervi vefmiðils.
Þeir þola enga aðra útgáfu af sannleikanum en sína eigin. En þó þú slítir úr mér tunguna, þá hefur þú ekki sýnt fram á að ég sé lygari. Aðeins sannað að þú hræðist það ég hef að segja.
Þeir þola enga aðra útgáfu af sannleikanum en sína eigin. En þó þú slítir úr mér tunguna, þá hefur þú ekki sýnt fram á að ég sé lygari. Aðeins sannað að þú hræðist það sem ég hef að segja.
Framsóknarflokkurinn hefur ákveðið upp á sitt eindæmi að fréttaflutningur og umfjöllun um afglöp og heimsmet þeirra í vanhæfni sé skaðlegur fyrir flokkinn og því skuli svelta RÚV og senda DV í afstöðuleiðréttingu.
Eins og frekir, dekraðir krakkar.
Ótíndir mafíósar.
Vanhæfir fasistar í ritskoðunarstuði.
Klaufalega hrasað inn á sviðið
Það er einmitt eitt það áhugaverðasta í þessu öllu saman - hversu klaufalega og taktlaust íslenskur fasismi hrasar inn á sviðið. Þegar bent er á að þau hegði sér eins og fasistar stígur einhvert þeirra fram og segir að þagga þurfi niður í viðkomandi. Finnst þetta bara ómálefnalegur dónaskapur! Ég held þau átti sig ekki á því hvað þetta er klunnalegt. Þau vita ekki að þau eru fasistar. Halda að spegillinn sé brotinn. Slysafasistarnir. Vilja bara þagga niður í dónum sem kalla þau ljótum nöfnum.
Ef Nasistaflokkurinn væri Disneyland
þá er Framsóknarflokkurinn Eden í Hveragerði,
eftir brunann.
Kaótísk aðför að frelsi fjórða valdsins
Þannig er Framsókn að kæfa gagnrýnendur sína. Engar ýkjur að kalla þá hegðun sínu rétta nafni, sem er ritskoðun og fasismi. Og þessa hegðun ber að taka alvarlega. Þegar alþjóðlegu samtökin Fréttamenn án landamæra gagnrýna hér rýrnun á frelsi fjölmiðla, og Öryggis- og samvinnustofnun Evrópu tekur í sama streng, þá er ástandið að verða krítískt. Fái þessi kaótíska aðför að frelsi fjórða valdsins að halda áfram mun uppýsingamiðlun á Íslandi smám saman einskorðast við það sem stjórnvöldum finnst í lagi að þú vitir.
Fái þessi kaótíska aðför að frelsi fjórða valdsins að halda áfram mun uppýsingamiðlun á Íslandi smám saman einskorðast við það sem stjórnvöldum finnst í lagi að þú vitir.
Allt í einu er enginn að segja satt lengur og krabbameinið í Hádegismóum dælir galli og greftri yfir allt og nýi jólasmellurinn með Gillz vá hvað þetta eru úrelt og skaðleg viðhorf, hey smelltu hér til að sjá júllur og þú trúir því ekki hvað gerist næst þegar þú mátt ekki segja rassgat því þá geturðu ekki sagt Sigmundur Davíð farðu í rassgat og aldrei verður upplýst um næsta lekamál af því að blaðamaðurinn sem hefði fjallað um það var rekinn eða þorði ekki að fjalla um það vegna þess að manneskjan sem braut af sér í starfi er sú sama og tekur ákvörðun um hvort nægt fjármagn sé til þess að þú getir haldið þínu.
Fasistarnir koma ekki alltaf marserandi inn með þýskan hreim í leðurstígvélum með hakakross á upphandleggnum hatandi gyðinga.
Stundum læðast þeir inn bakdyramegin með því að lofa þér pening, syngjandi þjóðsönginn, hatandi múslima og sannleikann.
