Á fyrstu sex mánuðum þessa árs notuðu íslenskir neytendur 7,2 milljónir gígabæta í farsímaneti. Það er 30 sinnum meira en þeir notuðu á fyrri hluta ársins 2010, tólf sinnum meira en á sama tímabili 2012, þrisvar sinnum meira en á fyrri hluta 2014 og 60 prósent meira en þeir voru búnir að gera eftir sex mánuði árið 2015.
Nova er með yfirburðastöðu þegar kemur að notkun gagnamagns á farsímaneti. Viðskiptavinir fyrirtækisins nota 68,2 prósent af öllu gagnamagni sem notað er á því neti. Viðskiptavinir Símans koma þar á eftir með um 18 prósent af heildarnotkuninni. Þeir sem versla við Vodafone nota 11,2 prósent og viðskiptavinir 365 2,4 prósent. Þetta kemur fram í nýrri tölfræðiskýrslu Póst- og fjarskiptastofnunar sem sýnir stöðuna á fjarskiptamarkaði um mitt ár 2016.
Nova, sem hóf starfsemi fyrir níu árum síðan, var selt til bandaríska eignastýringafyrirtækisins Pt Capital Advisors í byrjun október síðastliðins á yfir 15 milljarða króna. Seljandinn var stofnandi Nova, fjárfestingafélagið Novator sem er aðallega í eigu Björgólfs Thors Björgólfssonar.
Síminn sterkur í tengingum á fastaneti
Notkun á gangamagni í farsímaneti segir þó ekki alla söguna um gagnamagnsnotkun Íslendinga í gegnum farsíma eða önnur tæki sem geta tengst slíku neti. Uppistaðan af gagnamagnsnotkun Íslendinga á sér stað á fastanetinu. Þ.e. Íslendingar reyna frekar að vera með snjalltækin sín tengd fastaneti heima hjá sér, á vinnustöðum og víðar frekar en að notast við 3G eða 4G kerfin til að ná sér í gögn. Á fastanetinu er Síminn með mjög sterka stöðu.
Alls eru 48,9 prósent allra internettenginga á Íslandi hjá Símanum. Vodafone er með 28,3 prósent og eru þessir tveir aðilar með töluverða yfirburði á markaðnum. Þannig hefur staðan haldist undanfarin ár. 365 missti markaðshlutdeild á internetmarkaði í fyrra þegar hlutfall hennar fór úr 13 prósentum í 12,6 prósent. Sá niðurtúr hefur haldið áfram á fyrri helmingi þessa árs og er markaðshlutdeild 365 nú 11,8 prósent. Frá miðju ári 2015 hefur fyrirtækið misst 1.865 viðskiptavini í internetþjónustu.
Hringdu hefur hins vegar bætt vel við sig. Á síðasta ári og jókst markaðshlutdeild fyrirtækisins úr 3,7 prósent í 5,4 prósent. Um mitt ár 2016 var hún komin í 6,1 prósent. Viðskiptavinum Hringdu hefur fjölgað um 3.396 frá miðju ári 2014.
Nova hefur ekki selt internetþjónustu með öðrum hætti en í gegnum farsímakerfi á undanförnum árum. Á því varð breyting fyrr á þessu ári þegar að fyrirtækið tilkynnti að það ætlaði að hefja ljósleiðaraþjónustu. Því mun samkeppnin um internettengingarnar aukast til muna á næstunni. Þar sem einungis nokkrar vikur höfðu liðið frá því að Nova tilkynnti um áform sín um sölu á ljósleiðaratengingum þá er fyrirtækið ekki með í mælingum Póst- og fjarskiptastofnunar á internetmarkaðinum í nýjustu skýrslu stofnunarinnar.
4G-byltingin breytti öllu
Fjarskiptamarkaðurinn hefur tekið miklum breytingum á undanförnum árum og snýst nú um svo miklu meira en bara símtöl. Aðaláherslan nú er á gagnamagn, sem sést vel á þeirri aukningu sem orðið hefur á gagnamagni á farsímanetinu á undanförnum árum. Á árinu 2013 notuðu Íslendinga 2,7 milljónir gígabæta á farsímanetinu. Í fyrra notuðu þeir 10,2 milljónir gígabæta, eða tæplega fjórum sinnum meira magn. Á fyrri helmingi ársins 2016 var notkunin 7,2 milljónum gígabæti.
Ástæðan fyrir þessari miklu breytingu er sú að farsímatímabil fjarskiptageirans er liðið undir lok og gagnaflutningatímabilið tekið við. Tíðniheimildir fyrir 3G, fyrsta háhraðakynslóð farsímanetskerfið, voru boðnar út á Íslandi í lok árs 2006. Kerfið er í raun mun frekar netkerfi en farsímakerfi og gerði gagnaflutning mögulegan.
Næsti fasi stendur nú yfir, skrefið yfir í 4G-kerfið. Skrefið sem verður tekið upp á við með henni er stærra en margir átta sig á. Hraðinn á 4G-tengingu er tíu sinnum hraðari en í 3G og um þrisvar sinnum hraðari en hröðustu ADSL-tengingar.
4G-væðingin á Íslandi hófst af alvöru á árinu 2014 þegar fjöldi 4G-korta í símum fimmfaldaðist. Um mitt það ár voru 17,8 prósent allra virkra símakorta 4G-kort. Í lok júní 2016 var helmingur þeirra 4G-kort.
Sjónvarpsboxin
Í þeim tveimur tölfræðiskýrslum Póst- og fjarskiptastofnunar sem gefnar hafa verið út í ár var í fyrsta sinn nú birt yfirlit yfir heildarfjölda áskrifenda með sjónvarp yfir IP-net. Þ.e. hvernig „sjónvarpsboxin“ skiptast á milli þeirra aðila sem bjóða viðskiptavinum sínum upp á að vera með sjónvarp í gegnum nettengingar. Þeir aðilar eru þrír: Síminn, Vodafone og 365.
Síminn og Vodafone skipta að mestu með sér þeim markaði. Síminn er með 56,1 prósent hans en Vodafone með 37,8 prósent. Bæði fyrirtækin hafa bætt við sig viðskiptavinum frá miðju ári 2015. 365 er í fyrsta sinn talið með í nýjustu skýrslu Póst- og fjarskiptastofnunar og er með sex prósent markaðshlutdeild.
Í þessu samhengi skiptir ugglaust miklu máli að ekki er hægt að tengjast sjónvarpi Símans í gegnum ljósleiðaranet, sem byggst hefur upp á undanförnum árum. Þess í stað býður Síminn upp á svokallað ljósnet, sem tengist inn í heimili í gegnum kopartaug.
Þetta er fyrri fréttaskýring Kjarnans um nýja skýrslu Póst- og fjarskiptastofnunar. Síðari skýringin birtist á morgun.
