Ekki er sjálf­gefið að álverið í Straums­vík muni opna aft­ur, ef því verður lokað vegna verk­falls starfs­manna þar. Verk­fallið á að hefj­ast 2. des­em­ber næst­kom­andi. Þetta segir Ólafur Teitur Guðna­son, tals­maður Rio Tinto Alcan á Íslandi, við mbl.­is. 

Gylfi Ingv­ars­son, tals­maður starfs­manna álvers­ins, segir að verði það raunin sé fyr­ir­tækið að nota starfs­fólk sitt og gera það og verka­lýðs­fé­lög að blóra­böggli. 

Kjara­deila starfs­mann­anna í Straums­vík hefur staðið mjög lengi. Strandað hefur á því að Rio Tinto vill bjóða meira út í verk­töku. Næsti fundur í kjara­deil­unni er boð­aður á þriðju­dag­inn. 

Ákvæði í kjara­samn­ingi starfs­manna álvers­ins gerir ráð fyrir því að eftir að verk­fall hefst hafi fyr­ir­tækið aðgengi að starfs­mönnum í tvær vik­ur, til að lág­marka tjón þegar slökkt er á 480 kerjum álvers­ins. Ólafur Teitur segir að það sé hins vegar meiri­háttar mál að kveikja aftur á kerj­unum og það sé ekki sjálf­gefið að kveikt verði á þeim aftur yfir höf­uð. 

Gylfi segir að ef fyr­ir­tækið ætli í þá veg­ferð núna að loka álver­inu séu þeir að gera laun­þeg­ana að blóra­böggli. „Þá er Rio Tinto í þeirri veg­­ferð að finna ástæðu til að loka fyr­ir­tæk­inu. Við erum ekki í þeirri veg­­ferð, það eru þá eig­end­ur fyr­ir­tæk­is­ins. Fyr­ir­tækið stend­ur ekki og fell­ur með laun­um lægst laun­aða fólks­ins í fyr­ir­tæk­inu eins og þess sem þeir vilja fara með í verk­­töku. Þá er veg­­ferðin ein­hver önn­ur hjá þeim,“ segir Gylfi við mbl.­is.