Ólafur Ragnar Grímsson ætlar að sækjast eftir endurkjöri til forseta Íslands.
Ólafur sagði á blaðamannafundi á Bessastöðum síðdegis í dag, sem sjónvarpað var beint, að undanfarin ár hafi verið tími erfiðrar glímu, öldu mótmæla og stjórnarskipta. Fjöldaaðgerðir og þjóðaratkvæðagreiðslur. Nýlega söfnuðust þúsundir saman við alþingishúsið til að krefjast afsagnar forsætisráðherra og nýrra þingkosninga.
Ólafur sagði: „Þó að okkur hafi að mörgu leyti miðað vel eftir bankahrunið, þá voru mótmæli og ákveðið að flýta kosningum, er ástandið enn viðkvæmt. Stjórnvöld verða að vanda sig.
Í þessu umróti óvissu og mótmæla og í kjölfar nýliðinna atburða hefur fjöldi fólks víða að höfðað til skyldu minnar, reynslu og ábyrgðar og beðið mig að endurskoða ákvörðunina sem ég tilkynnti í nýársávarpinu. Um að gefa kost á mér á ný til embættis forseta Íslands.
Sambúð þings og þjóðar getur verið erfið stuttu eftir kosningar. Ýmsir höfðu borið upp slíkt erindi. Eftir atburði síðustu vikna og óvissuna framundan, hefur sú alda þrýstings orðið æði þung. Þessi þróun hefur sett mig í vanda. Það er frelsið frá daglegum önnum, togast á við skylduna. Óskir fólksins í landinu höfða til þess.
Það eru ekki allir á þessari skoðun. Að tími sé kominn til að annar skipi þetta embætti. En ég hef engu að síður þurft að horfast í augu við fjöldann sem lagt hefur hart að mér og höfðað til ábyrgðarinnar sem forsetinn ber og traustið sem það sýnir mér."
Leyndardómsfullur blaðamannafundur
Forsetinn boðaði til blaðamannafundarins í morgun, en ekki fékkst uppgefið hvert efni fundarins var. Miklar vangaveltur sköpuðust í kjölfarið, bæði á samfélagsmiðlum og í fjölmiðlum.
Ólafur Ragnar sagðist í nýársávarpi sínu 1. janúar síðastliðinn að hann ætlaði ekki að bjóða sig fram til embættis í sjötta sinn. Hann sagði þá að óvissan sem var fyrir hendi fyrir fjórum árum, og leiddi til áskorana um að hann yrði áfram forseti, móti ekki lengur stöðu Íslendinga. Búið væri að leggja til hliðar aðild að ESB, uppgjör föllnu bankanna og afnám hafta væri senn í höfn og deilur um stjórnarskrána hefðu vikið fyrir sátt.
Í forsetakosningunum 2012 hafði Ólafur áður gefið sterklega í skyn að hann ætlaði ekki að bjóða sig fram á ný. Hann skipti hins vegar um skoðun og um vorið þá ákvað hann að gefa kost á sér og sigraði með yfirburðum.
Ólafur Ragnar tók við embætti forseta Íslands árið 1996 og hefur setið í 20 ár á Bessastöðum. Hann hefur hlotið mikið fylgi í skoðanakönnunum upp á síðkastið, þrátt fyrir að hafa ekki gefið kost á sér til endurkjörs.
