Helsti mælikvarði á frjósemi, samkvæmt alþjóðlegum stöðlum, er fjöldi lifandi fæddra barna á ævi hverrar konu. Yfirleitt er miðað við að frjósemi þurfi að vera um 2,1 barn til þess að viðhalda mannfjöldanum til lengri tíma litið, samkvæmt frétt Hagstofu Íslands í dag.
Árið 2015 var frjósemi íslenskra kvenna 1,81 barn á ævi hverrar konu og hefur hún aldrei farið lægra frá því að mælingar hófust árið 1853. Árin 2013 og 2014 var frjósemi 1,93 en það er næst lægsta frjósemi sem hefur mælst hér á landi. Undanfarinn áratug hefur frjósemi á Íslandi verið rétt um tvö börn á ævi hverrar konu.
Frjósemi á Íslandi hefur verið með því hæsta sem gerist í Evrópu á síðustu árum. Árið 2014 var frjósemi yfir tveimur í Frakklandi (2,01) og í Tyrklandi (2,17) en þess utan voru öll löndin undir tveimur. Þá var frjósemi að meðaltali 1,58 í 28 löndum Evrópusambandsins árið 2014. Síðustu ár hefur fæðingartíðnin innan álfunnar verið lægst í löndum Suður-Evrópu og er árið 2014 engin undantekning en fæðingartíðni var 1,23 í Portúgal, 1,30 á Grikklandi og 1,31 á Kýpur.
Eins og við má búast voru flest nýfædd börn í fyrra skrásett með lögheimili í Reykjavík (1.574), í Kópavogi (445) og í Hafnarfirði (373). Flestar fæðingar voru í júlímánuði (385) en fæstar í desember (297). Árið 2014 fæddust flest börn í júlí (435) og fæst í desember og apríl (323).
Algengasti barneignaaldurinn er á milli 25-29 ára. Á þessu aldurbili fæddust 116 börn á hverjar 1.000 konur í fyrra. Fæðingartíðni mæðra undir tvítugu í fyrra var 7,9 börn á hverjar 1.000 konur.
