Magnús Geir Þórð­ars­son útvarps­stjóri hefur svarað bréfi Sig­mundar Dav­íðs Gunn­laugs­son­ar, þing­manns Fram­sókn­ar­flokks­ins og fyrr­ver­andi for­sæt­is­ráð­herra, sem birt­ist í Morg­un­blað­inu í morg­un. Þar fór Sig­mundur Davíð fram á afsök­un­ar­beiðni frá RÚV vegna þess hvernig komið hafi verið fram við hann og konu hans. 

Magnús Geir vísar þessu á bug í bréfi sínu, sem birt­ist á vef RÚV. Hann seg­ist marg­sinnis hafa farið yfir umfjöllun RÚV um Panama­skjölin og Sig­mund Davíð með Rakel Þor­bergs­dóttur frétta­stjóra og ætið blasi það sama við: „frétta­gildi máls­ins er ótví­rætt og það átti erindi við almenn­ing í land­inu. Þær upp­lýs­ingar sem fram komu í umræddum þætti standa og hafa ekki verið hrakt­ar. Með umræddum frétta­flutn­ingi var Rík­is­út­varpið að sinna sínu hlut­verki og skyld­um. Því er ekki til­efni til afsök­un­ar­beiðni Rík­is­út­varps­ins vegna máls­ins.“ 

Fjöl­miðlar eigi að vera full­trúar almenn­ings og þeim beri að spyrja kjörna full­trúa út í mál­efni er hann varða. Það sama eigi við um Sig­mund Davíð og aðra kjörna full­trúa. „Sig­mundur Davíð hefur ítrekað fengið tæki­færi til að koma sínum sjón­ar­miðum á fram­færi og fjallað hefur verið um þau í miðlum RÚV.“ 

Magnús Geir segir að störf Rík­is­út­varps­ins séu opin­berar og almenn­ingur geti lagt sjálf­stætt mat á þau en stofn­unin njóti yfir­burða­trausts meðal almenn­ings sam­kvæmt mæl­ing­um. 

„Ef almenn­ingur er ósáttur við til­tekin atriði í frétta­flutn­ingi, þá tekur RÚV fús­lega við athug­semdum og svarar með form­legum hætti. Ef við­kom­andi er ósáttur við þá afgreiðslu sem hann fær hjá stofn­un­inni, þá er hægt að beina mál­inu til sjálf­stæðrar siða­nefndar sem leggur sjálf­stætt mat á fram­göngu starfs­manna RÚV en að auki má benda á að allir geta skotið málum til Blaða­manna­fé­lags Íslands.  Ef þing­mað­ur­inn telur á sig hallað þá hvet ég hann til að beina málum í þennan form­lega far­veg sem er til staðar fyrir hann eins og aðra.“