Sigríður Andersen, dómsmálaráðherra, segist ekki sjá neinn tilgang í því að íslenska ríkið reki fjölmiðil eins og Ríkisútvarpið.
Þetta kemur fram í viðtali við hana í Fréttablaðinu. „Með því er ég ekki endilega að ýta því út af borðinu að menn geti styrkt íslenska dagskrárgerð og annað – en það er hægt eftir öðrum leiðum. Mér finnst einfaldlega fráleitt að ríkið reki fjölmiðil, með margar rásir og mikil útgjöld. Ég geri enga kröfu til þess að fréttastofa ríkisins haldi hlutleysi[...] Á fréttastofu ríkisútvarpsins er bara fólk að vinna, sem hefur sínar skoðanir eins og annað fólk. Skoðanir reka mann áfram. Vonandi starfar fólk þar faglega, en kröfu um hlutleysi held ég að sé mjög erfitt að halda til streitu,“ segir Sigríður í viðtalinu.
Hún segir að hugsanlega hafi einhvern tíma hafa verið rök fyrir fjölmiðli í eigu ríkisins en sá tími sé löngu liðinn. „Kannski var allt í lagi að halda þessu úti þegar það var heilmikið verk að kaupa tæki til útsendingar. Sú rök eru ekki lengur til staðar, það getur hver sem er gert þetta og þar fyrir utan er fullt af fjölmiðlum starfrækt í landinu. Það er ekki eins og þetta ágæta fólk sem vinnur á RÚV myndi hverfa þótt ríkið myndi hætta að reka miðilinn.“
Í viðtalinu er spurt hvort ekki sé fulllangt gengið að vilja leggja RÚV niður? Stofnunin hafi eftir allt saman lögbundið hlutverk og geymi vænan hluta menningararfs þjóðarinnar. „Í pólitískum raunveruleika, þá ætla ég ekki að berjast fyrir því að RÚV verði lagt niður eða selt, en það gæti vel komið til greina að takmarka reksturinn við eins og eina útvarpsstöð. Það er möguleiki að taka stofnunina af auglýsingamarkaði en þá kemur þessi krafa um meira fjármagn frá ríkinu. Mér finnst þessi umræða raunar vera sérstök, því það er ekki hægt að vera endalaust í bútasaumi á ónýtu kerfi. Þetta er samkeppnisrekstur og ríkið á ekki heima í slíku umhverfi,“ segir Sigríður.
