Íbúða­fé­lagið Bjarg hyggst byggja 1.150 leigu­heim­ili, lang­tíma leigu­hús­næði á hag­stæðum kjörum, á næstu 4 árum í Reykja­vík og Hafn­ar­firði fyrir rúma 30 millj­arða króna. 

Þetta kemur fram í frétta­til­kynn­ingu frá Bjargi.

„Bygg­ing­ar­magn er rúm­lega 80 þús­und fer­metrar sem er eins og að byggja tvær Kringl­ur,“ sagði fram­kvæmda­stjór­inn Björn Trausta­son í erindi sem hann hélt á fundi Íbúða­lána­sjóðs í dag, að því er segir í til­kynn­ing­u. 

Sjóð­ur­inn til­kynnti þar um síð­ari úthlutun árs­ins á stofn­fram­lögum til upp­bygg­ingar 124 hag­kvæmra leigu­í­búða, svo­kall­að­ara leigu­heim­ila, fyrir alls 677 millj­ónir króna. Bjarg er einn þeirra sjö aðila sem fengu úthlutað stofn­fram­lagi hjá Íbúða­lána­sjóði í dag.

Alls hef­ur þá verið úthlutað fram­lögum til bygg­ingar 509 íbúða vegna árs­ins 2016 í sam­ræmi við lög sem Alþingi setti síð­asta haust. Sam­tals nema fram­lögin 2,8 millj­örðum króna en heild­ar­kostn­aður vegna verk­efn­anna er marg­föld sú upp­hæð.

Með stærstu upp­bygg­ing­ar­verk­efnum

Björn sagði frá nýju Reykja­vík­ur­hús­unum sem eru hag­kvæm íbúð­ar­hús sem Bjarg fyr­ir­hugar að byggja á þétt­ing­ar­reitum borg­ar­innar á næstu árum. Alls um 1.000 leigu­í­búðir sem verða fyrir ein­stak­linga og fjöl­skyldur og fyrir félaga­sam­tök til fram­leig­u. 

Um er að ræða eitt stærsta bygg­ing­ar­verk­efni sem hefur farið í gang á Íslandi. Reynt verður að fara nýjar og skap­andi leiðir í hönnun og útfærslu hús­anna til að auka vist­hæfi þeirra en einnig er mark­mið að efla félags­auð íbú­anna, m.a. með því að skoða mögu­leika á sam­eign­ar­rýmum og samnýt­ingu sam­göngu­tækja. Björn segir að unnið hafi verið með Félags­bú­stöðum að verk­efn­inu sem fái um 20% íbúð­anna og verður þeim blandað inn á milli ann­arra íbúða. Björn nefndi að mikil áhersla væri lögð á hönn­un. „Fólk á ekki að fá á til­finn­ing­una að það sé í ann­ars flokks úrræð­i,“ sagði Björn.

Björn gagn­rýndi hversu miklum breyt­ingum deiliskipu­lag hefur tekið á síð­asta ára­tug. „Það hafi meðal ann­ars haft í för með sér hækk­aðan bygg­ing­ar­kostn­að. Áður fyrr hafi deiliskipu­lag verið ein­falt; teikn­ing sem sýndi lengd, breidd og hæð. Í dag eru deiliskipu­lags­höf­undar oft búnir að teikna húsið alveg og velja á það lit. Flækju­stigið sé ein­fald­lega orðið of mik­ið,“ segir í til­kynn­ingu.

Fast­eigna­verð hefur rokið upp að und­an­förnu og hækk­aði það um 18,6 pró­sent milli ára, miðað við tölur frá því í febr­úar á þessu ári. Þjóð­skrá hefur bent á að mikil vöntu sé á íbúðum á mark­aði, en það er eitt af því sem skýrir hvers vegna verðið hefur rokið upp. Um átta þús­und íbúðir vantar inn á markað til að hægt sé að ná jafn­vægi á mark­aðn­um, að mati Þjóð­skrár.