Trygg­inga­fé­lagið VÍS hefur gengið frá kaupum á 3,06 pró­senta hlut Eigna­safns Seðla­banka Íslands (ESÍ) í Kviku, en greint er frá þessu í Mark­aðnum í dag. 

Eftir kaupin á VÍS lið­lega 25 pró­senta hlut og er lang­sam­lega stærsti ein­staki hlut­hafi fjár­fest­inga­bank­ans, að því er segir í umfjöll­un­inni. Hlutur ESÍ var aug­lýstur til sölu um miðjan síð­asta mán­uð.

Áður hafði VÍS keypt 22 pró­senta hlut í Kviku í árs­byrjun og nam heild­ar­kaup­verðið þá um 1,6 millj­örðum króna. Heild­ar­virði Kviku er því um 7,2 millj­arðar króna, sé mið tekið af því kaup­verð­i. 

Ekki fást stað­festar upp­lýs­ingar um hvað félagið greiddi fyrir hlut Seðla­bank­ans í Kviku en ef gengið var hið sama og í jan­úar síð­ast­liðn­um, þegar VÍS keypti bréf í bank­anum fyrir 5,4 krónur á hlut, þá nemur kaup­verðið um 230 millj­ónum króna, segir í Mark­aðn­um.

„Í hlut­hafa­hópi Kviku eru jafn­framt tveir stærstu einka­fjár­fest­arnir í VÍS með sam­an­lagt fimmtán pró­senta hlut. Hjónin Svan­hildur Nanna Vig­fús­dóttir og Guð­mundur Örn Þórð­ar­son, fyrr­ver­andi aðal­eig­endur Skelj­ungs, eign­uð­ust þannig ríf­lega átta pró­senta hlut í bank­anum í des­em­ber 2016 auk þess sem félagið Grandier ehf., sem er í eigu Sig­urðar Bolla­sonar og með­fjár­festa, keypti á sama tíma um sjö pró­sent. VÍS og stórir hlut­hafar í félag­inu eiga því núna sam­an­lagt um 40 pró­senta hlut í Kviku banka,“ segir í umfjöllun Mark­að­ar­ins.

Miðað við gengi bréfa VÍS á mark­aði í morgun er mark­aðsvirði félags­ins nú 23,4 millj­arð­ar.