Grein­ing­ar­deild Arion banka spáir 0,5 pró­sentu­stiga vaxta­lækkun á þessu ári eftir að Már Guð­munds­son seðla­banka­stjóri hafi gefið vís­bend­ingar um að frek­ari lækkun vaxta og afnám bindi­skyld­u á erlenda fjár­fest­ingu séu á næsta leiti. Þetta kemur fram í nýbirtum mark­aðs­punkti Arion.

Í við­tali Bloomberg við Má segir hann að bank­inn sé að vinna í því að lækka vexti sína á meðan ann­ars staðar fari þeir hækk­andi. Sam­kvæmt grein­ing­ar­deild­inni er þetta annar tónn en hefur heyrst frá með­limum pen­inga­stefnu­nefnd­ar, en yfir­lýs­ingar hennar upp á síðkastið hafi boðað nokkuð hlut­lausa fram­sýna leið­sögn. Engu að síður hafi mátt lesa á milli lín­anna að a.m.k. hluti nefnd­ar­innar sé í vaxta­lækk­un­ar­gír. 

Kjarn­inn birti fyrir skömmu upp úr fund­ar­gerð pen­inga­stefnu­nefndar fyrir síð­ustu vaxta­á­kvörðun í júní, en þá voru stýri­vextir lækk­aðir um 0,25 pró­sentu­stig. Sam­kvæmt fund­ar­gerð­inni vildu tveir nefnd­ar­með­limir ganga enn lengur og lækka stýri­vexti um hálft pró­sentu­stig, meðal ann­ars vegna geng­is­styrk­ingu krón­unnar og lágrar verð­bólgu.

Sam­kvæmt grein­ing­ar­deild Arion er „erfitt að túlka það öðru­vísi en að frek­ari vaxta­lækk­anir séu í kort­un­um,“ eftir við­tal Bloomberg. Þar að auki benti Már á í við­tal­inu að lægri vextir dragi úr hvata til vaxta­mun­ar­við­skipta og að þar með opn­ist svig­rúm til þess að draga úr bindi­skyld­u á erlenda fjár­fest­ingu, en til­gang­ur bindi­skyld­unn­ar er að draga úr slíkum við­skipt­u­m. 

Út frá nýrri lang­tíma­verð­bólgu­spá grein­ing­ar­deild­ar­innar gerir hún ráð fyrir lækkun vaxta um 50 punkta það sem eftir lifir árs, en að vextir standi svo í stað í 4% árið 2018. Helstu rökin fyrir áfram­hald­andi vaxta­lækkun séu fyrst og fremst stöðugar vænt­ingar um verð­bólgu og að hún hald­ist nálægt mark­miði sín­u.