Don­ald J. Trump Banda­ríkja­for­seti ræddi mikið um Kína í kosn­inga­bar­áttu sinni, ekki síst á fjöl­mennum fundum í mið­ríkj­un­um. Hann lof­aði því að fjölga störfum í Banda­ríkj­unum með því að hækka tolla á inn­flutn­ing á vörum frá Kína.

Nú hefur hann hrint þessu í fram­kvæmd, þvert á ráð­legg­ingar frá sínum nán­asta efna­hags­ráð­gjafa, Gary Cohn, sem hætti störfum vegna ágrein­ings við for­set­ann. 

Banda­ríkin hafa nú haft frum­kvæði að tolla­stríði við Kína, og birtu í gær lista yfir um 1.333 vöru­teg­undir sem munu bera 25 pró­sent tolla. Vör­urnar sem um ræðir eru fjöl­breyti­leg­ar. Þar á meðal eru vara­hlutir í vél­ar, gervi­hnett­ir, fatn­aður og lyf, svo fátt eitt sé nefn­t. 

Banda­ríkin höfðu áður lýst yfir tollum sem koma harka­lega við kín­verska hags­muni, með 25 pró­sent tolli á stál­inn­flutn­ing og 10 pró­sent toll á ál. Kín­verjar hafa brugð­ist við þessum aðgerðum Banda­ríkja­stjórnar með því að boða hækkun á tollum á ýmsum vörum, sem Banda­ríkin flytja til Kína. 

Stjórn­völd í Pek­ing hafa harð­lega gagn­rýnt aðgerðir Banda­ríkja­stjórn­ar, og hafa hvatt til still­ingar þegar kemur að breyt­ingum á við­skipta­samn­ingum sem nú þegar eru í gild­i. 

Trump telur að Banda­ríkin hafi farið illa út úr við­skiptum við Kína á und­an­förnum árum, og vill með hækkun tolla reyna að tryggja að banda­rísk fyr­ir­tæki, ekki síst í þunga­iðn­aði, nái vopnum sínum á nýjan leik. 

Eins og rakið var í frétta­skýr­ingu á vef Kjarn­ans í gær, þá bendir margt til þess að alþjóð­legir fjár­festar ótt­ist afleið­ingar þess að toll­stríðið hefj­ist af fullum krafti.