Björn Leví Gunn­ars­son, þing­maður Pírata, segir að nær allan tím­ann sem flokk­ur­inn hefur verið á þingi hafi verið unnið að því innan hans að gera flokk­inn stjórn­tæk­an. Afleið­ingin sé sú að Píratar líti út eins og stjórn­mála­flokk­ur.

Hann segir Pírata þrátt fyrir það vera að breyta stjórn­mál­unum og séu ekki gam­al­dags­stjórn­mála­flokk­ur. „Leiðin framundan er eitt­hvað nýtt og Píratar eru að draga þann vagn. Aðrir eru að fylgja. Þess vegna sýn­ist kannski líka vera minni mun­ur.“ Þetta kemur fram í stöðu­upp­færslu sem Björn Leví birtir á Face­book. Til­efnið er við­tal við Birgittu Jóns­dótt­ur, einn af stofn­endum og fyrr­ver­andi kaftein Pírata, í Reykja­vík Grapevine þar sem hún útskýrir að ein af ástæð­unum fyrir því að hún hætti í flokknum sé sú að hann hafi breyst úr hreyf­ingu í stjórn­mála­flokk.

Björn Leví segir í stöðu­upp­færsl­unni að Birgitta komi „hlutum af stað og fer“. Mark­mið hennar hafi verið að koma Pírötum af stað og gera flokk­inn stjórn­tæk­an. „Það tókst. Afleið­ingin er jú að Píratar líta út fyrir að vera stjórn­mála­flokk­ur. Við erum hins vegar að breyta stjórn­mál­un­um, þannig að það er amk. ekki hægt að segja að Píratar séu gam­al­dags stjórn­mála­flokk­ur. Leiðin framundan er eitt­hvað nýtt og Píratar eru að draga þann vagn. Aðrir eru að fylgja. Þess vegna sýn­ist kannski líka vera minni mun­ur.“

Í sam­tali við Kjarn­ann í byrjun apríl sagði Birgitta að hún hafi farið inn á Alþingi fyrst fyrir átta árum með vænt­ingar um raun­veru­­legar breyt­ingar á sam­­fé­lag­inu eftir hrun­ið. „Ég lét mig dreyma um aðkomu almenn­ings að mál­um, nýja stjórn­­­ar­­skrá og ein­hverjar raun­veru­­legar breyt­ingar þannig að þeir sem fara með völdin axli ábyrgð þegar þeir klúðra ein­hverju. Ekk­ert af þessu hefur gengið eft­­ir.“