Óformlegar viðræður hafa átt sér stað milli flokkanna sem eiga fulltrúa á borgarstjórn, en ljóst er að Viðreisn, með Þórdísi Lóu Þórhallsdóttur og Pawel Bartoszek sem borgarfulltrúa, er í góðri stöðu til að ráða því hvers konar meirihlutasamstarf verður myndað.
Flokkarnir sem mynduðu meirihluta áður eru með 10 fulltrúa, en aðrir flokkar með 13. Samfylkingin fékk sjö borgarfulltrúa en Sjálfstæðisflokkurinn átta.
Í viðtölum hafa oddvitar flokkanna rætt um mögulegt meirihlutasamstarf, og hefur Eyþór Arnalds, oddviti sigurvegarana í Sjálfstæðisflokki, sagt að flokkurinn sé tilbúinn til samstarfs við alla flokka, ef samstaða næst um málefni.
Píratar, með tvo borgarfulltrúa, hafa útilokað samstarf við Sjálfstæðisflokk og það gerir Samfylkingin líka. Sósíalistaflokkurinn, með einn fulltrúa, hefur einnig útilokað samstarf við Sjálfstæðisflokk. Vinstri græn eru með einn fulltrúa.
Í bæði Morgunblaðinu og Fréttablaðinu í dag, segir að fulltrúar flokkanna í borginni hafi átt óformlegar viðræður um myndun meirihluta, sín á milli, en gert er ráð fyrir að það skýrist á næstu dögum hvernig meirihluti verður myndaður í borginni.
