Afkoma VÍS á öðrum árs­fjórð­ungi verður að óbreyttu verri en afkomu­spá hafði gert ráð fyr­ir, að því er fram kemur í afkomu­við­vörun frá VÍS á vef kaup­hallar Íslands. 

Ein stærsta ástæðan fyrir þess­ari stöðu eru stjór­tjón sem lendir á VÍS að bæta. Þar á meðal er bruna­tjón í Perlunni og einn almennur auk­inn tjóna­þungi á síð­ustu þremur mán­uð­um.

Reiknað er með því að afkoman verði um 700 millj­ónum lak­ari en afkomu­spá hafði gert ráð fyr­ir. Þessi staða étur upp nær allan hagnað sem reiknað hafði verið með. Afkomu­spáin hafði reiknað með 792 millj­óna króna hagn­aði í stað 92 millj­óna. 

Mark­aðsvirði VÍS er nú 29,4 millj­arðar króna, en verð­mið­inn á félag­inu hefur hækkað um 32,7 pró­sent á und­an­förnum 12 mán­uðum og um rúm­lega 18 pró­sent á árinu 2018. 

Stærsti hlut­hafi þess er Líf­eyr­is­sjóður versl­un­ar­manna með 9,97 pró­sent hlut.

„Fé­lagið heldur áfram að sjá kröft­ugan vöxt í iðgjöldum og er sam­sett hlut­fall und­an­far­inna 12 mán­aða í lok júní áætlað 98%. Vænt sam­sett hlut­fall fyrir árið 2018 er einnig 98%, þar af nema áhrif tveggja stór­tjóna á öðrum árs­fjórð­ungi um þremur pró­sentu­stigum á sam­sett hlut­fall árs­ins. Afar óvenju­legt er að tvö stór­tjón af þess­ari stærð­argráðu verði á sama árinu, hvað þá á sama fjórð­ungn­um. Bæði tjónin eru af umfangi sem ekki hefur sést hjá VÍS síðan í óveðr­inu í mars 2015 og brun­anum í Skeif­unni sum­arið 2014,“ segir í afkomu­við­vör­un­inni.