Berg­þór Óla­son, þing­maður Mið­flokks­ins, skrifar á Face­book síðu sína í kvöld,  að hann hafi nú þegar beðið Ingu Sæland, for­mann Flokks fólks­ins, afsök­unar á því hvernig hann tal­aði um hana í sam­tali við aðra þing­menn flokks­ins á bar nýver­ið. 

Stundin segir frá því að Berg­þór Óla­­son hafi kallað Ingu Sæland, for­­mann og stofn­anda Flokks fólks­ins, „húrr­andi klikk­­aða kunt­u“. 

DV og Stundin fengu upp­tök­urnar sendar nafn­laust og hafa í kvöld skrifað fréttir upp úr þeim, en í fréttum þeirra hefur meðal ann­ars komið fram að Sig­mundur Davíð Gunn­laugs­son, Berg­þór Óla­son og Gunnar Bragi Sveins­son, hafi talað með niðr­andi hætti um stjórn­mála­konur. 

„Í kvöld hafa verið fluttar fréttir af hitt­ingi sex þing­manna á hót­el­bar í lið­inni viku. Eins og fram hefur komið varð mér þar hressi­lega á í mess­unni hvað munn­söfnuð varð­ar, í garð mann­eskju sem hafði ekk­ert sér til sakar unnið til að verð­skulda þá yfir­haln­ingu. Þar virð­ist ég hafa notað orð­færi sem er mér fram­andi og ég veit ekki til að ég hafi áður not­að.

Ég ræddi við Ingu Sæland í kvöld og bað hana afsök­unar á fram­göngu minni. Um sam­starfið við Flokk fólks­ins vil ég segja að það hefur verið með miklum ágætum síð­asta árið, enda mál­efna­legur sam­hljómur um marga hluti.

Flest þekkjum við að hafa í lok­uðu rými talað óvar­lega, og jafn­vel af ósann­girni um annað fólk, þá sér­stak­lega þegar öl er haft um hönd, en það breytir því ekki að svona á maður ekki að tala um fólk,“ segir Berg­þór Óla­son á Face­book síðu sinni.

Sig­mundur Davíð hefur þegar tjáð sig um málið á Face­book síðu sinni, og segir það alvar­legt ef það eru stund­aðar hler­anir á einka­sam­tölum stjórn­mála­manna.