Stýri­vextir í Banda­ríkj­unum eru nú 2,5 pró­sent en Seðla­banki Banda­ríkj­anna hækk­aði vext­ina í fjór­gang á árinu 2018, sem reitti Banda­ríkja­for­seta, Don­ald Trump, til mik­illar reiði. Hann ræddi meðal ann­ars opin­ber­lega að Seðla­banka­stjór­inn, Jer­ome Powell, væri orð­inn „gal­inn“ (cr­azy).

Sam­kvæmt umfjöllun Wall Street Journal í dag, víð­lesn­asta dag­blaðs Banda­ríkj­anna, eru margir fjár­fest­ar, þar á meðal fag­fjár­festa­sjóð­ir, farnir að veðja á að Seðla­bank­inn muni fara sér hægar í vaxta­hækk­unum á þessu ári og þá hægar en efna­hags­spár bank­ans hafa gert ráð fyr­ir. 

Það gæti haft jákvæð áhrif á þróun eigna­verðs, en árið í fyrra var það versta á hluta­bréfa­mark­aði í Banda­ríkj­unum í ára­tug. 

Sam­kvæmt þeim var horft til þess að vextir gætu hækkað upp fyrir 3 pró­sent á árinu 2020, en fjár­festa telja nú að vext­irnir gætu orðið þeir sömu í lok þessa árs og þeir eru nú í upp­hafi, eða 2,5 pró­sent. 

Ástæðan fyrir því að allra augu eru nú á vöxt­unum er ekki síst sú, að þessi tölu­verða vaxta­hækkun sem var á árinu 2018 hefur haft tölu­verð áhrif í banda­rísku efna­hags­lífi, og meðal ann­ars leitt til kæl­ingar á fast­eigna­mörk­uðum vítt og breitt. Fast­eigna­verð er víða tekið að lækka, enda hækkar vaxta­stigið fjár­magns­kostnað og getur þannig dregið úr eft­ir­spurn eftir fast­eign­um. 

Að öðru leyti eru hag­tölur í Banda­ríkj­unum taldar jákvæðar þessi miss­er­in. Atvinnu­leysi mælist um 4 pró­sent,  og hag­vöxtur verður á bil­inu 2 til 3 pró­sent á þessu ári ef spár ganga eft­ir. 

Áhrif af tolla­stríði Banda­ríkj­anna og Kína hafa þó frekar reynst nei­kvæð fyrir Banda­rík­in, en margar spár gera ráð fyrir að það fari að draga til tíð­inda í við­ræðum milli Banda­ríkj­anna og Kína, sem muni leiða til breyt­inga í við­skiptum land­anna. Óvíst er þó hvernig sú breyt­ingar verður og hvað hún mun þýða fyrir efna­hags­lífið í hvoru landi fyrir sig.