Svar Seðla­banka Íslands til Þor­steins Más Bald­vins­son­ar, for­stjóra Sam­herja, vegna beiðni hans um að stjórn­vald­sekt bank­ans yrði aft­ur­köll­uð, var ekki í sam­ræmi við lög og vinnu­brögðin voru gagn­rýni­verð. 

Þetta kemur fram í áliti Umboðs­manns Alþingis, Tryggva Gunn­ars­son­ar, sem birt var á vef emb­ætt­is­ins í dag. 

„Það er álit mitt að með svari Seðla­banka Íslands frá 9. maí 2018 við erindi A um aft­ur­köllun ákvörð­unar um stjórn­valds­sekt sem bank­inn lagði á hann [...] 2016 hafi ekki verið leyst með full­nægj­andi hætti úr erindi hans. Ekki verður séð að bank­inn hafi við með­ferð máls­ins tekið afstöðu til þeirra rök­semda sem A vís­aði til beiðni sinni til stuðn­ings, m.a. um afstöðu rík­is­sak­sókn­ara til gildis laga og reglna um gjald­eyr­is­mál sem full­nægj­andi refsi­heim­ilda. Með vísan til þess er það álit mitt að svar seðla­bank­ans hafi ekki verið í sam­ræmi við lög.

Ég beini því til Seðla­banka Íslands að taka erindi A til nýrrar með­ferð­ar, komi fram ósk þess efnis frá hon­um, og haga þá með­ferð máls­ins í sam­ræmi við þau sjón­ar­mið sem gerð er grein fyrir í álit­inu. Ég beini jafn­framt þeim til­mælum til Seðla­banka Íslands að taka fram­vegis og við úrlausn sam­bæri­legra mála mið af þeim sjón­ar­miðum sem koma fram í álit­inu. Í ljósi eft­ir­lits­hlut­verks banka­ráðs Seðla­banka Íslands hef ég jafn­framt ákveðið að senda því afrit af þessu áliti til upp­lýs­inga,“ segir í loka­orðum bréf Umboðs­manns Alþing­is.

Í bréfi sínu gagn­rýnir Umboðs­maður Alþing­is, að for­svars­menn seðla­bank­ans, og aðrir þeir sem voru með á fundi sem hann átti með þeim í októ­ber 2015, hafi ekki upp­lýst hann um afstöðu rík­is­sak­sókn­ara til álita­efnis sem fjallað var um. Segir hann að það sé gagn­rýni­vert í ljósi þess eft­ir­lits­hlut­verks sem emb­ættið fer með sam­kvæmt lög­um.

Gylfi Magn­ús­son, for­maður banka­ráðs Seðla­bank­ans, segir í við­tali við RÚV að banka­ráðið hafi tekið álitið til umfjöll­unar á fundi sínum í morg­un. 

Hann segir að það komi fram hörð gagn­rýni í áliti umboðs­manns á stjórn­sýslu bank­ans í mál­inu. Banka­ráð hafi á fundi sínum ályktað að bank­inn ætti að bregð­ast við þessu og taka málið upp í sam­ræmi við ábend­ingar umboðs­manns. Kanna ætti hvort taka þyrfti upp önnur sam­bæri­leg mál.