Á annan tug mála, þar sem til rannsóknar er meint peningaþvætti, eru nú til meðferðar „og í ljósi áherslu stjórnvalda á þennan málaflokk verður á næstu misserum lagður aukinn kraftur í rannsóknir þessara mála hjá skattrannsóknarstjóra.“
Þetta kemur fram í frétt á vef Skattrannsóknarstjóra ríkisins þar sem fjallað eru um lög um aðgerðir gegn peningaþvætti og fjármögnun hryðjuverka sem tóku gildi 1. janúar á þessu ári. Skattrannsóknarstjóri er Bryndís Kristjánsdóttir.
Með lögunum er lögð skylda á aðila, sem stunda starfsemi er kann að verða notuð til peningaþvættis eða fjármögnunar hryðjuverka, að þekkja deili á viðskiptamönnum sínum og starfsemi þeirra og tilkynna um það til lögbærra yfirvalda vakni grunur um eða verði þeir varir við slíka ólögmæta starfsemi.
Skrifstofa fjármálagreininga lögreglu tekur á móti tilkynningum um viðskipti þar sem grunur er um peningaþvætti eða fjármögnun hryðjuverka. Sér skrifstofan um greiningu á mótteknum tilkynningum og miðlar þeim m.a. til skattrannsóknarstjóra ríkisins.
Skattrannsóknarstjóra hafa borist tæplega 40 greinar frá árinu 2016 á grundvelli reglugerðar nr. 175/2016, um meðhöndlun tilkynninga um ætlað peningaþvætti eða fjármögnun hryðjuverka, að því er fram kemur á vef Skattrannsóknarstjóra.
„Á árinu 2018 var rannsókn lokið í 6 málum sem eiga
uppruna til greininga frá peningaþvættisskrifstofu (nú skrifstofa
fjármálagreininga lögreglu) en þessar rannsóknir eru oft umsvifamiklar og
tímafrekar. Gera má ráð fyrir að ríkissjóður hafi orðið af á annað hundrað milljónum í skatttekjur einungis af þessum sex málum,“ segir í umfjöllun á vef Skattrannsóknarstjóra.
