Mich­ael Cohen, fyrr­ver­andi lög­maður Don­alds Trumps Banda­ríkja­for­seta, sagði eið­svar­inn frammi fyrir þing­nefnd Banda­ríkja­þings að Don­ald Trump væri lyg­ari, kyn­þátta­hat­ari og svindl­ari. 

Hann sagð­ist sjá eftir því að hafa starfað fyrir Trump og fram­kvæmt margt ólög­legt, og baðst afsök­unar á því að hafa logið frammi fyrir þing­nefnd­inni áður, en hann hefur hlotið dóm fyrir það og mun að öllum lík­indum hefja afplánun þriggja ára dóms í vor. 

Cohen lagði fram skjöl með yfir­lýs­ingu sem hann las upp áður en hann svar­aði spurn­ingum þing­manna, og sagð­ist geta stutt ásak­anir um að Trump hefði vitað að hann hefði verið að brjóta gegn lög­um, meðal ann­ars með því að greiða tveimur konum um 250 þús­und Banda­ríkja­dali sam­an­lagt fyrir að þegja og segja ekki frá kyn­ferð­is­legu sam­bandi þeirra við hann.

Þá sagði Cohen að Trump hefði verið inn í öllum málum Trump-­sam­steypunnar þegar Cohen hefði verið þar einn yfir­manna (EVP) og að ekk­ert hefði gerst nema að hann hefði átt loka­orð­ið. Hann sagði Trump hafa lagt fram ranga papp­íra til að reyna að fá fjár­magn frá Deutsche Bank og að yfir­lit hans um skuldir og eignir væri ekki í takt við veru­leik­ann. Lagði hann fram skjöl um þetta. 

Óhætt er að segja að þing­menn Repúblik­ana hafi sótt fast að Cohen. Þeir spurði í fyrstu hvernig væri hægt að treysta orðum hans nú, í ljósi þess að hann hefði verið dæmdur fyrir að ljúga að Banda­ríkja­þingi. Cohen sagð­ist skilja það, en að hann gæti stað­fest það sem hann hefði sagt með gögn­um, og það væri ekki hann sem ætti að vera ein­blína á heldur Banda­ríkja­for­seti. Hann væri ekki maður sem hægt væri að treysta.

Þá sagði Cohen að Trump myndi svífast einskis til að ná sínu fram, og að hann hefði metið það sem sem svo að hann gæti ekki annað en varið sig og fjöl­skyldu sína, með því að segja sann­leik­ann um for­set­ann. 

Jim Jor­dan, Repúblikani í nefnd­inni sem Cohen kom fyr­ir, sagði Cohen aug­ljós­lega vera að koma fram núna til að „hefna sín á for­set­an­um“ eftir að hafa hlotið dóm. 

Þessu neit­aði Cohen, og sagð­ist ein­ungis vilja segja banda­rísku þjóð­inni frá því að for­set­inn væri óheið­ar­legur mað­ur.

Don­ald Trump, sem fundar nú með leið­toga Norð­ur­-Kóreu, Kim Jong-Un, í Víetnam, tjáði sig um vitn­is­burð Cohen á Twitter og gerði lítið úr orðum hans. Sagði hann ein­ungis hafa verið einn af mörgum lög­mönnum hans, og að hann hefði aug­ljós­lega ekki verið góð­ur.