Niðurstaða Samkeppniseftirlitsins er sú að ekki sé tilefni til íhlutunar vegna samruna Kviku banka og GAMMA og mun því samrunninn eiga sér stað, þar sem öllum fyrirvörum verður aflétt.
Kvika banki keypti allt hlutafé í GAMMA Capital Management á tæplega 2,9 milljarða króna, og var tilkynnt um viðskiptin til kauphallar, en fyrirvarinn var sá að Samkeppniseftirlitið myndi veita samþykki fyrir samrunanum.
Miðað við bókfært virði árangurstengdra þóknana hjá GAMMA í lok júní 2018 nemur kaupverðið þó 2,4 milljörðum króna. Kaupverðið er greitt með 839 milljónum króna í reiðufé, með hlutdeildarskírteinum í sjóðum GAMMA upp á 535 milljónir króna auk þess sem árangurstengdar greiðslur sem metnar eru á 1.032 milljónir króna verða greiddar þegar langtímakröfur á sjóði GAMMA innheimtast, að því er fram kom í tilkynningu vegna viðskiptanna.
„Kvika hefur starfsleyfi sem viðskiptabanki en megináhersla bankans er á eignastýringu og fjárfestingarbankastarfsemi (þ.e. markaðsviðskipti, fyrirtækjaráðgjöf og lánastarfsemi). Gamma er rekstrarfélag verðbréfasjóða í skilningi laga nr. 161/2002 um fjármálafyrirtæki. Starfsemi Gamma einskorðast að mestu við eignastýringu en einnig sinnir félagið fyrirtækjaráðgjöf. Með hliðsjón af rekstrarstarfsemi samrunaaðila tekur samruni þessi nær eingöngu til eignastýringar þar sem umsvif Gamma á öðrum sviðum fjármálaþjónustu sem Kvika býður einnig upp á, eru afar lítil.
Að undangenginni rannsókn er niðurstaða Samkeppniseftirlitsins sú að ekki séu fyrir hendi vísbendingar um að samruninn leiði til myndunar eða styrkingar markaðsráðandi stöðu samrunaaðila á neinum markaði. Jafnframt verður ekki séð að samkeppni á mörkuðum raskist að öðru leyti með umtalsverðum hætti.
Að því er varðar markað fyrir stýringu verðbréfa- og fjárfestingarsjóða (sem standa almenningi til boða) hefur m.a. verið litið til þess að um er að ræða samruna tveggja tiltölulega smárra aðila á markaðnum og samþjöppun
markaðshlutdeildar eykst tiltölulega lítið. Hvað varðar markað fyrir stýringu sjóða fyrir fagfjárfesta, þá búa samrunaaðilar m.a. við öfluga samkeppni frá stóru viðskiptabönkunum þremur, kaupendaaðhald almennra lífeyrissjóða og annarra fjársterkra aðila, auk
þess sem allnokkur fjöldi smærri fyrirtækja býður upp á stýringu fyrir fagfjárfesta. Þá hefur það þýðingu í þessu sambandi að stóru viðskiptabankarnir þrír eru hver um sig miklum mun stærri en sameinað félag samrunaaðila og njóta því mun meiri fjárhagslegs
styrkleika heldur en hið sameinaða félag,“ segir í tilkynningu frá Samkeppniseftirlitinu.
