Mario Drag­hi, for­seti stjórnar Seðla­banka Evr­ópu, til­kynnti í dag um umfangs­miklar aðgerðir bank­ans til að örva hag­vöxt á evru­svæð­in­u. 

Ekki eru nema rúmir tveir mán­uðir síðan að bank­inn hætti form­lega með umfangs­mikla áætlun sína um örvun hag­kerfa evru­svæðs­ins sem fólst í kaupum á skulda­bréf­um, fyrir um 60 millj­arða evra í hverjum mán­uð­i. 

Um mitt síð­asta ár til­kynnti bank­inn um að hann myndi hætta með áætl­un­ina, og var það gert til að gefa fyr­ir­tækjum og þjóð­ríkjum svig­rúm til að laga sig að breyttum veru­leika, en aðgerðir seðla­bank­ans hafa skipt sköpum fram­gang efna­hags­mála á evru­svæð­inu, enda umfang aðgerð­anna mik­ið. 

Horfur í efna­hags­málum í Evr­ópu hafa versnað hratt und­an­farin miss­eri, og byggja aðgerðir bank­ans nú á því, að þörf sé á því að bank­inn láti til sín taka til að skapa betri jarð­veg fyrir vöxt. 

Þetta verður gert með lán­veit­ingum á lágum vöxtum til fjár­mála­fyr­ir­tækja, sem síðan geta lánað áfram til fyr­ir­tækja og fjár­festa. Vextir bank­ans eru í núlli. Aðgerð­irnar nú byggja því að hluta á því að end­ur­vekja áætlun bank­ans sem hætt var með í byrjun árs, en bank­inn metur það svo að nauð­syn­legt sé að styðja við þróun mála á evru­svæð­inu, að því er fram kemur í til­kynn­ingu bank­ans. 

Hag­vaxt­ar­spá bank­ans var nýlega upp­færð, og gerir nú ráð fyrir 1,1 pró­sent hag­vexti á þessu ári í stað 1,7 pró­sent áður. Atvinnu­leysi í Evr­ópu hefur farið lækk­andi und­an­farin miss­eri og mælist nú 6,5 pró­sent.