Benedikt Bogason, formaður stjórnar dómstólasýslunnar, segir stjórnvöld hafa farið nokkuð geyst í að fullyrða að vísa ætti dómi Mannréttindadómstólsins til yfirdeildar hans áður en faglegt mat var lagt á slíkt, í samtali við Morgunblaðið í dag. Stjórn dómstólasýslunnar samþykkti á föstudaginn að meta skuli áhrif málskots til yfirdeildar Mannréttindadómstólsins áður en ákvörðun um slíkt er tekin. Katrín Jakobsdóttir forsætisráðherra mun tilkynna Alþingi viðbrögð stjórnvalda við dómnum í dag.
Leggja til að dómurum við Landsrétt verði fjölgað í 19
Í dómi Mannréttindadómstólsins sem birtur var í síðustu viku fengu bæði Sigríður Á. Andersen, þáverandi dómsmálaráðherra, og Alþingi á sig áfellisdóm fyrir það hvernig haldið var á skipan 15 dómara við Landsrétt í byrjun júní 2017. Benedikt segir, í samtali við Morgunblaðið í dag, að dómsmálaráðherra hafi sagt í sínu fyrsta viðtali við fjölmiðla eftir að dómur Mannréttindadómstólsins féll að stefnt væri að skjóta málinu áfram. Hann telur hins vegar að það þurfi að staldra við og meta kosti og galla þess að annars vegar skjóta málinu áfram og vera í óvissu til framtíðar eða þá una dómnum og gera þær lagfæringar sem efni séu til. Á fundi stjórnar dómstólasýslunnar á föstudaginn síðastliðnum var samþykkt með fjórum atkvæðum gegn einu að meta skuli áhrif málskots til yfirdeildar áður en ákvörðun um slíkt sé tekin.
Stjórn dómstólasýslunnar lét einnig fær til bókunar á fundinum að ráðlagt sé að fjölga dómurum við Landsrétt. Fjórir dómarar af fimmtán geta nú að óbreyttu ekki gengið í dómsstörf við Landsrétt eftir dóm Mannréttindadómstólsins auk þess sem einn af þeim ellefu sem eftir eru fer í leyfi næst haust. Stjórnin leggur því til að lagabreyting þess efnis verði lögð fram um að fjölga dómurum við réttinn úr fimmtán í nítján, þar sem dómarinar fjórir hafi skipunarbréf og því verði ekki breytt. Stjórn dómstólasýslunnar fundaði á föstudag með Þórdísi Kolbrúnu Reykfjörð Gylfadóttur, sem tók við embætti dómsmálaráðherra á fimmtudag, og gerði ráðherra grein fyrir bókun sinni.
Skýrsla um viðbrögð stjórnvalda við dómi MDE
Áformað er að Landsréttur komi saman að nýju í dag, en hlé var gert á störfum dómsins eftir að dómur Mannréttindadómstólsins var kveðinn upp í síðustu viku. Þrír af dómurunum verða þó áfram frá störfum vegna niðurstöðu Mannréttindadómstólsins og sá fjórði er í námsleyfi.
Fréttastofa Rúv hefur greint frá því að Katrín Jakobsdóttir forsætisráðherra mun flytja Alþingi skýrslu klukkan tvö í dag um viðbrögð stjórnvalda við dómi Mannréttindadómstóls Evrópu sem féll í síðustu viku.
