Alþingi borgaði 1.171.560 krónur í áskrift að Morgunblaðinu árið 2018 og 508.032 krónur fóru í gagnasafn mbl.is. sem er langsamlega hæsta upphæðin sem fór til fjölmiðla í fyrra. Alþingi er með þrettán prentáskriftir að Morgunblaðinu auk netáskrifta.
Þetta kemur fram í svari forseta Alþingis, Steingríms J. Sigfússonar, við fyrirspurn frá Birni Leví Gunnarssyni, þingmanni Pírata um áskrift að dagblöðum, tímaritum og öðrum miðlum en um er að ræða kostnaðartölur við árið 2018.
Björn Leví lagði fram sömu fyrirspurnina á alla tólf ráðherra ríkisstjórnarinnar sem og forseta Alþingis í byrjun marsmánaðar. Hann spurði hvaða dagblöðum, tímaritum og öðrum miðlum ráðuneytin – og stofnanir og aðrir aðilar sem heyra undir þau – væru í áskrift að, hversu margar áskriftir væru að hverjum miðli og hver heildarfjárhæð áskriftar væri á ári fyrir hvern miðil.
Í svari Steingríms kemur fram að Alþingi sé með ellefu prentáskriftir að DV, þrjár að Viðskiptablaðinu auk netáskrifta og eina netáskrift að Stundinni. Alþingi fær fimmtán eintök af Fréttablaðinu og átta af Bændablaðinu auk rafræns aðgangs.
Alþingi er með áskrift að sjö tímaritum: Gestgjafanum, Læknablaðinu, Vísbendingu, Tímariti lögfræðinga, Tímariti Úlfljót, Tímariti Skógræktarfélagi Íslands og Tímariti Ægis.
Jafnframt er Alþingi áskrifandi að öðrum miðlum á borð við gagnasafni mbl.is, landsaðgangi tímarita og gagnasafna og heimildasafni Fons Juris sem er aðgangur fyrir lagaskrifstofu, nefndasvið og upplýsingaþjónustu.
Tvö fjölmiðlafyrirtæki fá þriðjung af auglýsingafé ríkisins
Fram kom í frétt Kjarnans í lok nóvember síðastliðins að ráðuneyti, ríkisstofnanir og fyrirtæki á vegum hins opinbera hefðu borgað tæpar 190 milljónir króna fyrir birtingu auglýsinga fyrstu tíu mánuði síðasta árs. Tvö fjölmiðlafyrirtæki, útgáfufélag Fréttablaðsins og Árvakur útgefandi Morgunblaðsins, fengu samtals tæplega þriðjung fjárins sem hið opinbera eyddi í auglýsingabirtingar.
Kostnaður hins opinbera vegna auglýsingabirtinga var 188 milljónir fyrstu tíu mánuði ársins 2018, þá var ekki talin með vinna við gerð og hönnun auglýsinga. Þar af fékk útgáfufélag Fréttablaðsins 37 milljónir króna greitt fyrir auglýsingabirtingar og Árvakur, útgefandi Morgunblaðsins og mbl.is, 21 milljón króna. Samanlagt var það rétt tæplega þriðjungur allra auglýsingakaupa ráðuneyta, ríkisstofnana og ríkisfyrirtækja á tímabilinu.
Ríkisútvarpið fékk greiddar rúmar tólf milljónir og Sýn, sem á Stöð 2, ýmsar útvarpsstöðvar og vefinn Vísi, fékk fimm milljónir greiddar fyrir auglýsingabirtingar ríkisins.
Auglýsingastofan Pipar er í þriðja sæti yfir þau fyrirtæki sem fá mest greitt fyrir auglýsingabirtingar, með átján milljónir. Það er vegna birtingarþjónustu fyrirtækisins við ríkisstofnanir, einkum Háskóla Íslands. Pipar sér um auglýsingakaup fyrir viðskiptavini og greiðslurnar dreifast því áfram á önnur fyrirtæki.
