„Eftir að hafa greitt frá­far­andi banka­stjóra Aríon 150 millj­ónir í starfs­loka­samn­ing sagði bank­inn 100 starfs­mönnum upp störfum í gær. Við­brögð fjár­mála­kerf­is­ins er að fara fram á skatta­lækkun á bank­ana. Þetta eru und­ar­leg við­brögð svo ekki sé meira sagt, svo ekki sé talað um skort á marg­um­tal­aðri sam­fé­lags­á­byrgð stór­fyr­ir­tækja.“ 

Þetta segir Drífa Snædal, for­seti ASÍ, í viku­legum pistli sínum þar sem hún fer hörðum orðum um fram­ferði Arion banka. „ Í mínum huga felst sam­fé­lags­á­byrgð í því að taka ákvarð­anir út frá hags­munum heild­ar­innar en ekki fárra ein­stak­linga. Að lækka banka­skatt­inn þýðir minni tekjur í rík­is­sjóð sem þýðir minna úr að spila til að halda uppi vel­ferð allra. Þetta gengur þvert á þá áherslu vinn­andi fólks að fyr­ir­tæki og ein­stak­lingar sem eru aflögu­færir greiði meira til sam­fé­lags­ins en aðrir minna. Það er sér­stak­lega kald­hæðn­is­legt að fara fram á lækkun banka­skatts­ins þegar við sjáum merki þess að atvinnu­lausum fjölgar – meðal ann­ars fyrir til­stilli bank­anna.“

Vilja skila hlut­höfum meiri arði

Arion banki sagði upp um 100 starfs­mönnum í gær auk þess sem 12 var sagt upp hjá Valitor, dótt­ur­fé­lagi bank­ans. Þá sagði Íslands­banki upp 20 manns. 

Aðgerðirnar rök­studdar með því að bank­inn væri ekki að skila hlut­höfum sínum nægj­an­lega miklum arði og því þyrfti að draga úr rekstr­ar­kostn­aði. Yfir­lýst stefna bank­ans er að arð­semi eig­in­fjár sé yfir tíu pró­sent en á öðrum árs­fjórð­ungi var hún 4,3 pró­sent. Alls hefur hagn­aður Arion banka numið 3,1 millj­arði króna á fyrstu sex mán­uðum árs­ins 2019. Bene­dikt Gísla­son, nýráð­inn banka­stjóri Arion banka, sagði að rekstr­ar­um­hverfi bank­ans væri krefj­andi og nefndi þar sér­stak­lega sér­tæka skatt­lagn­ingu sem lögð er á islenska banka í formi hins svo­kall­aða banka­skatts. Alls greiddu þeir bankar sem greiða skatt­inn 10,6 millj­arða króna í rík­is­sjóð vegna hans í fyrra. Til stóð að banka­skatt­ur­inn myndi verða lækk­aður á næsta ári en nú hefur verið hætt við þá. Hann á nú að lækka í skrefum frá árinu 2021. 

Upp­sagn­irnar hjá Arion banka eiga að spara bank­anum 1,3 millj­arð króna á árs­grund­velli en um 900 millj­ónir króna kostar að reka þá vegna greiðslna sem fylgja því. Fyrr á þessu ári hætti Hösk­uldur Ólafs­son störfum sem banka­stjóri bank­ans. Að eigin sögn var hann ekki rek­inn. Við starfs­lok voru Hös­k­uldi greiddar 150 millj­ónir króna. Kostn­aður við starfs­lok Hösk­uldar var því einn sjötti af þeim kostn­aði sem féll til þegar um 100 manns var sagt upp í Arion banka í gær.