Christine Lag­ar­de, banka­stjóri Seðla­banka Evr­ópu, segir að gera þurfi miklu meira til að örva fjár­fest­ingu í Evr­ópu. Alltof lítil fjár­fest­ing, í svo til öllum geirum hag­kerfa álf­unn­ar, sé það sem telja megi sem helstu ógn­ina fyrir efna­hags­líf Evr­ópu­landa. 

Verð­bólgu­mark­mið Seðla­banka Evr­ópu er 2 pró­sent, en verð­bólga mælist undir 1 pró­sent í Evr­ópu. Lag­arde sagði í sinni fyrstu ræðu sem banka­stjóri Seðla­banka Evr­ópu, síð­ast­lið­inn föstu­dag, að fjár­fest­ing þyrfti að aukast ef ekki ætti illa að fara. 

Hvatti hún rík­is­stjórnir Evr­ópu­landa til að auka fjár­fest­ingu og efla inn­viði, til að vinna gegn hæga­gangi í álf­unni. Í umfjöllun FT segir meðal ann­ars, að Lag­arde hafi sagt nauð­syn­legt að auka fjár­fest­ingu í rann­sókn­um, þróun og mennt­un, auk þess sem nýsköpun og tækni væri ekki nægi­lega mikið inn á radar fjár­festa. 

Atvinnu­leysi í Evr­ópu hefur farið lækk­andi und­an­farin miss­eri, en það mælist nú 6,3 pró­sent. Mest fór það upp undir 12 pró­sent árið 2013. Þrátt fyrir að staða á vinnu­mark­aði hafi batn­að, þá hafa áhyggjur af ónægri fjár­fest­ingu og minni umsvifum í ýmsum geirum, valdið vax­andi áhyggj­um. Lag­arde sagði að aukin fjár­fest­ing, ekki síst hins opin­bera, væri rétta svarið við þeim aðstæðum sem uppi væru.