„Við vitum að við erum í betri færum en mörg lönd til að bregð­ast við, þar sem við höfum þrátt fyrir allt borið gæfu til, að hafa mikla sam­neyslu, með öfl­ugu opin­beru heil­brigð­is­kerfi, góðum skólum og vel­ferð­ar­þjón­ustu – þótt vissu­lega þurfi að gera enn bet­ur. Við vitum líka að jafn­vel hægri­s­inn­að­asta fólk áttar sig á þessu og vill að rík­is­valdið komi nú atvinnu­líf­inu til bjargar – og það þarf vissu­lega að gera það. Veita skjóta og skil­virka aðstoð sem þarf þó í rík­ara mæli að ná til fólks­ins sjálfs og heim­ila þess. Við vitum hins vegar ekki hve lengi vinstri slag­síða hægri­manna end­ist – þótt okkur gruni það.“

Þetta er meðal þess sem Logi Ein­ars­son, for­maður Sam­fylk­ing­ar­inn­ar, sagði í ræðu sinni eftir að for­sæt­is­ráð­herra flutti munn­lega skýrslu um áhrif COVID-19 far­ald­urs­ins og um við­brögð stjórn­valda við þeim áhrif­um. 

Logi sagði í ræðu sinni að það þyrfti að gera mun meira en þegar hefði verið gert. Styðja þyrfti betur við ýmsa hópa, til dæmis lítil fyr­ir­tæki sem bannað hefur verið að veita þjón­ustu, heim­ila, leigj­enda, atvinnu­lausra og náms­manna.

Hann sagð­ist hafa þá trú að traust á stjórn­málum myndi aukast með víð­tæk­ari sam­vinnu stjórn­mála­hreyf­inga á þessum furðu­legu tím­um. „Því þykir mér það mið­ur, að rík­is­stjórnin hafi ekki treyst sér í nán­ara sam­starf allra flokka um aðgerða­pakka til handa atvinnu­lífi og almenn­ingi. Flest okkar nágranna­ríki hafa farið þá leið.“

Vill áherslu á jöfnuð og fjöl­breytni

Logi sagði að í augna­blik­inu væri verið að slökkva elda en í fram­hald­inu þyrfti að hafa kjark og fram­sýni til að ráð­ast í breyt­ingar á skatt­kerf­inu; deila gæðum jafnar og tryggja að auð­lindir lands­ins skili almenn­ingi sann­gjörnum arði. „Óhjá­kvæmi­legt er að þau sem eiga meira að borga meira, og þeim sem eiga minna sé hlíft. Og þó sam­staða, sam­á­byrgð og æðru­leysi almenn­ings vegi vissu­lega mjög þungt, þegar við siglum okkur hægt og rólega út úr þess­ari krísu, hafa síð­ustu vikur líka sýnt okkur nauð­syn þess að leggja í sam­eig­in­lega sjóði sem geta tryggt öfl­ugt opin­bert heil­brigð­is­kerfi, vel­ferð­ar­þjón­ustu og örygg­is­net þegar á þarf að halda. Þess vegna er einmitt ágætur tími núna til að minna sig á skatt­greiðslur eru vafa­laust besta fjár­fest­ing sem nán­ast hvert og eitt okkar ræðst í yfir ævina.“

Til fram­tíðar þyrfti að skjóta styrk­ari stoðum undir fjöl­breytt­ara atvinnu­líf og skapa fleiri störf sem byggi á hug­viti. „Til þess þurfum við þó að ráð­ast í bylt­ing­ar­kennda sókn í mennta­mál­um. Það kann að virka nokkuð bratt að horfa lengra fram í tím­ann nokkra daga við þessar aðstæð­ur, en við höfum ein­fald­lega ekki efni á öðru. 

Tvö orð þurfa að verða leið­ar­stef í leið­angrinum framund­an: Jöfn­uður og fjöl­breytn­i.“