Aðstoð­arutan­rík­is­ráð­herra Rúss­lands, Vla­dimir Titov, fór í sjóstanga­veiði með Vil­hjálmi Vil­hjálms­syni, for­stjóra útgerð­ar­fyr­ir­tæk­is­ins HB Granda, og Krist­jáni Lofts­syni, hlut­hafa og ­stjórn­ar­manni í HB Granda og fram­kvæmda­stjóri Hvals hf., um borð í íslensku skipi sem heitir Aur­ora á Faxa­flóa um miðj­an ­síð­asta mán­uð. Stundin greinir frá þessu í dag. Aðrir um borð í skip­inu voru Anton V. Vasili­ev, sendi­herra Rúss­lands á Íslandi, Jón Ólafur Hall­dórs­son, for­stjóri Olís og ­kaup­sýslu­mað­ur­inn Erlendur G. Auð­uns­son, sem meðal ann­ars hefur stundað kjöt­út­flutn­ing frá Íslandi. Titov var þá staddur hér á landi og fund­aði meðal ann­ars í utan­rík­is­ráðu­neyt­inu.

Jón Ólafur Hall­dórs­son segir í sam­tali við Stund­ina að um skemmti­sigl­ingu hafi verið að ræða en ekki fund. Krist­ján Lofts­son vildi ekki ræða ferð­ina við blaða­mann Stund­ar­inn­ar.

Sjáv­ar­út­vegs­fyr­ir­tækin Hvalur og HB Grandi tengj­ast tveimur málum er varða sam­skipti við rúss­nesk stjórn­völd. Ann­ars vegar flutti Hvalur um 1.700 tonn af hval­kjöti frá Trömsö í Nor­egi, norður fyrir Rúss­land áleiðis til Japan. Hins vegar á HB Grandi mik­illa hags­muna að gæta í Rúss­landi, en í kjöl­far þess að inn­flutn­ings­bann Rússa tók gildi fyrir íslenskar afurðir þann 13. ágúst síð­ast­lið­inn þá greindi HB Grandi frá því að 17 pró­sent tekna félags­ins 2014 hafi komið til vegna við­skipta á Rúss­lands­mark­aði.

Íslenskir ráða­menn og hags­muna­að­ilar hafa fundað og rætt við rúss­nesk stjórn­völd í kjöl­far banns­ins. Kjarn­inn greindi frá því í gær að Kol­beinn Árna­son, fram­kvæmda­stjóri Sam­taka fyr­ir­tækja í sjáv­ar­út­vegi, hitti sendi­herra Rúss­landi á Íslandi í fyrra­dag.  Sig­mundur Davíð Gunn­laugs­son for­sæt­is­ráð­herra ræddi við Dmi­try Med­vedev, for­sæt­is­ráð­herra Rúss­lands, sím­leiðis dag­inn eftir að bannið tók gildi og þá hitti Sig­urður Ingi Jóhanns­son, sjáv­ar­út­vegs- og land­bún­að­ar­ráð­herra, sendi­herra Rússa á Íslandi, sama dag og bannið tók gildi.