Edda Hermannsdóttir hefur verið ráðin samskiptastjóri Íslandsbanka. Hún mun bera ábyrgð á samskiptum og upplýsingagjöf bankans til fjölmiðla sem og samfélagsstefnu bankans.
Þetta kemur fram í tilkynningu frá bankanum. Edda hefur starfað sem blaðamaður á Viðskiptablaðinu frá því 2012 og verið aðstoðarritstjóri frá 2014. Hún hefur einnig starfað við dagskrárgerð, meðal annars sem stjórnandi Gettu betur, spurningakeppni framhaldsskólanna, hjá Ríkisútvarpinu frá 2011 til 2013. Hún er hagfræðingur frá Háskóla Íslands. Hún situr einnig í stjórn Félags viðskiptafræðinga og hagfræðinga. Edda mun hefja störf 18. júní næstkomandi.
„Íslandsbanki leggur áherslu á góð samskipti við fjölmiðla og kappkostar að veita skýr og greinargóð svör við spurningum fjölmiðla eftir því sem kostur er. Samfélagsstefna bankans, Heildun, er ein þriggja stefnuáherslna bankans. Með Heildun leggur Íslandsbanki áherslu á að vera fyrirmynd í umhverfinu með stefnu sinni í samfélagslegri ábyrgð. Bankinn kappkostar að hafa jákvæð áhrif á samfélagið, leggja áherslu á heilbrigðan rekstur sem byggir á góðum viðskiptaháttum og bjóða gott og uppbyggilegt vinnuumhverfi fyrir starfsmenn bankans,“ segir ennfremur í tilkynningunni um ráðningu Eddu.
