Spil­arar EVE Online tölvu­leiks­ins veita hærri fjár­hags­að­stoð til Rauða Kross Íslands vegna jarð­skjálft­ans í Nepal heldur en íslensk stjórn­völd veita. Rauða kross­inum verður í dag veittar sam­tals 13,8 millj­ónir króna sem söfn­uð­ust frá spil­urum EVE Online. Fram­lag íslenskra stjórn­valda nemur tíu millj­ónum króna en fram­lögin tvö eru stærstu ein­stöku fram­lögin í söfnun Rauða kross­ins.

Starfs­fólk CCP mun fyrir hönd spil­ara afhenda Rauða kross­inum upp­hæð­ina í dag við lista­verkið Heimar í heimi sem stendur við höf­uð­stöðvar CCP.

Fram kemur í til­kynn­ingu frá CCP að söfn­unin fór alfarið fram í leiknum sjálfum og rennur féð óskipt til Rauða Kross­ins á Íslandi, sem enn stendur fyrir víð­tækri söfnun fyrir hjálp­ar­starfi í Nepal.

Söfnin fór þannig fram að spil­arar EVE Online létu fé af hendi rakna til hjálp­ar­stafs­ins í Nepal með gjald­miðl­inum PLEX (Pilot Licence Extension), sem er annar af tveim gjald­miðlum EVE heims­ins sem spil­arar leiks­ins nota (hinn ber nafnið ISK). Raun­virði hvers PLEX er um 15 banda­ríkja­doll­arar og sér CCP um að koma því fé sem spil­arar leiks­ins safna yfir í banda­ríkja­doll­ara og síðan til Rauði kross­ins á Íslandi, sem stendur fyrir neyð­ar­að­stoð í Nepal og styður alþjóð­legt hjálp­ar­starf á svæð­inu.

Þetta er í sjötta sinn sem CCP í sam­starfi við spil­ara EVE Online ýtir úr vör söfn­unar­átaki til mann­úð­ar­mála undir slag­orð­inu PLEX for Good. Áður hafa spil­arar leiks­ins stutt við fórn­ar­lömb flóða í Pakistan, jarð­skjálft­ana á Haí­tí, felli­byls­ins Katr­ina í Banda­ríkj­un­um, jarð­skjálfta og flóða í Japan og felli­byls­ins sem skók Fil­ips­eyjar fyrir tveimur árum um alls 45 millj­ónir króna (­yfir 340.000 banda­ríkja­dala). Met var slegið í síð­ustu söfnun fyrir íbúa Fil­ips­eyjar þegar rúm­lega 22 millj­ónir króna söfn­uð­ust. Að með­töldu fram­lag­inu til Nepal hafa spil­ara leiks­ins því safnað og gefið hátt í 60 millj­ónir til mann­úð­ar­stafa.