Herferð UN Women á Íslandi um Öruggar borgir (e. Safe Cities Global Initiative) hófst í dag og stendur yfir næstu daga. Markmið verkefnisins er að skapa konum, unglingum og börnum öruggt líf í borgum án ótta við ofbeldi.
Inga Dóra Pétursdóttir, framkvæmdastýra UN Women.
Hjarta herferðarinnar eru þrjú gagnvirk myndbönd sem segja þrjár stuttar sögur úr íslenskum raunveruleika. Myndböndin sýna þrjár konur á mismunandi aldri í mismunandi aðstæður sem verða fyrir mismunandi kynferðislegu ofbeldi. Sá sem horfir á myndbandið sér atburðarrásina á tölvuskjánum sínum og með því að para snjallsímann sinn saman við myndbandið getur viðkomandi einnig séð sjónarhorn gerandans í myndböndunum þremur. Síminn og framleiðslufyrirtækið Tjarnargatan framleiddu myndböndin.
Hægt er að horfa á myndbandið á heimasíðu herferðarinnar hér.
Hægt er að styrkja herferðina með því að senda sms-ið oruggborg í símanúmerið 1900.
Ofbeldi gegn konum er heimsfaraldur
Í tilkynningu vegna herferðarinnar segir Inga Dóra Pétursdóttir, framkvæmdastýra UN Women, að ofbeldi gegn konum sé heimsfaraldur. „Óhætt er að segja að það ríki neyðarástand í stórborgum víðsvegar um heiminn þar sem konur og stúlkur eiga erfitt með að ferðast til og frá vinnu eða sækja skóla vegna ótta við ofbeldi og áreitni í almenningsrýmum. Meira að segja í öruggustu borgum heims eins og Reykjavík verða konur fyrir ofbeldi af ýmsu tagi.“
Orri Hauksson, forstjóri Símans.
Orri Hauksson, forstjóri Símans, tekur í sama streng og segir að ofbeldi gegn konum sé alþjóðlegt vandamál sem viðgengst í öllum samfélögum. „Með þessu átaki tökum við hjá Símanum höndum saman við UN Women við að vekja athygli á því að þetta er samfélagslegt mein hér á Íslandi, ekki síður en annars staðar. Afraksturinn rennur svo þangað sem hans er mest þörf.“
Reykjavíkurborg mun í næstu viku skrifa undir samning um að höfuðborg landsins verði örugg borg. Þar með gengur hún í hóp 18 borga víðsvegar um heiminn sem hafa heitið hinu sama.
Á meðan að herferðin stendur yfir munu fjölmargir pistlar um öruggar borgir birtast á heimasíðu Kjarnans. Hægt er að lesa meira um herferðina og styrkja sambærilega verkefni í fátækustu löndum heims á heimasíðu landsnefndar UN Women á Íslandi.