Eignir hluta­bréfa­sjóða í rekstri banka og ann­arra fjár­mála­fyr­ir­tækja námu alls um 105,7 millj­örðum króna í lok sept­em­ber 2015. Á einu ári hafa eignir þeirra auk­ist um 32,9 millj­arða króna og nema nú meiru en þær gerðu í júlí 2007, þegar þær stóðu hæst fyrir hrun. Taka skal fram að um er að ræða stærðir á verð­lagi hvers árs. 

Þetta sýna nýjar hag­tölur Seðla­banka Íslands um verð­bréfa- og fjár­fest­inga­sjóða og lána­fyr­ir­tæki. Línu­ritið hér að neðan sýnir eignir hluta­bréfa­sjóða frá árs­byrjun 2006. Eins og sjá má þá þurrk­uð­ust eignir þeirra nán­ast út í kjöl­far hruns­ins 2008 en hafa vaxið veru­lega, ekki síst á síð­ustu rúmu 12 mán­uð­um, sam­hliða miklum hækk­unum á inn­lendum hluta­bréfa­mark­aði. Á vef Keld­unnar má jafn­framt sjá yfir­lit yfir ávöxtun hluta­bréfa­sjóða, sem nemur í sumum til­vikum á bil­inu 40 til 50 pró­sentum á síð­ustu tólf mán­uð­um.

Eignir verð­bréfa­sjóða alls námu um 200 millj­örðum króna í sept­em­ber síð­ast­liðn­um. Auk mik­ils vaxtar hluta­bréfa­sjóða, sem juku eigna­stöðu sína um 6,6 millj­arða milli ágúst og sept­em­ber, þá hafa pen­inga­mark­aðs­sjóðir einnig stækkað mik­ið. Á síð­ustu tólf mán­uðum hafa eignir pen­inga­mark­aðs­sjóða, þ.e. skulda­bréfa­sjóða, auk­ist um 39,4 millj­arða króna. Eignir pen­inga­mark­aðs­sjóða í lok sept­em­ber 2015 námu um 77 millj­örðum króna, sam­kvæmt tölum Seðla­bank­ans.

Í lok sept­em­ber voru starf­andi 159 sjóð­ir, þar af 51 verð­bréfa­sjóð­ur, 52 fjár­fest­inga­sjóðir og 56 fjár­fest­inga­sjóð­ir. Níu af þessum sjóðum voru í slita­ferli en aðrir starf­andi.