Fjár­tækni­fyr­ir­tækið Meniga hefur tryggt sér eins og hálfs millj­arðs króna fjár­mögn­un. Sam­kvæmt til­kynn­ingu frá fyr­ir­tæk­inu var fjár­mögn­unin leidd af hol­lenska fjár­fest­inga­sjóðnum Velocity Capi­tal Fin­tech Fut­ures og íslenska fjár­fest­inga­sjóðnum Frum­tak Ventures.

Aðrir þátt­tak­endur voru sænski fjár­fest­inga­sjóð­ur­inn Industri­fonden, breski sjóð­ur­inn UK Fut­ure Fund og bank­arnir UniCredit, Swed­bank, BPCE og Íslands­banki. Þessir bankar og fjár­fest­inga­sjóðir eiga það sam­eig­in­legt að hafa verið lengi í hópi eig­enda og við­skipta­vina Meniga.

Sam­kvæmt til­kynn­ingu frá Meniga hefur heims­far­ald­ur­inn valdið því að spurn eftir staf­rænni banka­þjón­ustu hefur stór­auk­ist um heim all­an. Féð sem nú fæst frá fjár­festum verður nýtt til þess að efla sölu- og þjón­ustuteymi fyr­ir­tæk­is­ins og áhersla verður lögð á vöru­þróun og nýsköp­un.

„Sér­stak­lega verður horft til þró­unar og mark­aðs­setn­ingar á vörum þar sem fjár­tækni og umhverf­is­mál koma sam­an. Á meðal nýrra vara Meniga er umhverf­is­varan Car­bon Insight en hún gerir bönkum mögu­legt að vald­efla við­skipta­vini sína í umhverf­is­mál­um. Með Car­bon Insight geta not­endur net­banka séð áætlað kolefn­is­spor á einka­neyslu sinni og gripið til aðgerða til lág­marka það. Vör­unni er ætlað að hjálpa fólki um allan heim að berj­ast við loft­lags­breyt­ing­ar,“ segir í til­kynn­ingu fyr­ir­tæk­is­ins.

Haft er eftir Georg Lúð­víks­syni for­stjóra og með­stofn­anda Meniga að mikil ánægja sé með áfram­hald­andi stuðn­ing fjár­festa. „Nýtt fjár­magn mun gera okkur kleift að mark­aðs­setja vörur okkar til vænt­an­legra við­skipta­vina um allan heim. Car­bon Insight er gott dæmi um vöru sem mik­ill áhugi er á en að minnsta kosti fjórir bankar í jafn­mörgum löndum munu taka hana í gagnið á þessu ári og við sjáum vax­andi eft­ir­spurn eftir henni hjá bönkum um allan heim,“ segir Georg.

Í frétta­til­kynn­ingu Meniga er einnig haft eftir Svönu Gunn­ars­dótt­ur, fram­kvæmda­stjóra Frum­tak Ventures, að sjóð­ur­inn hafi frá upp­hafi verið sann­færður um að Meniga hefði mjög spenn­andi vaxt­ar­mögu­leika á sviði fjár­tækni.

„Meniga hefur fest sig í sessi sem öfl­ugur braut­ryðj­andi í fjár­tækni­lausnum fyrir helstu banka um allan heim, en sá mark­aður er nú í örum vexti sem aldrei fyrr,“ er haft eftir Svönu.