Maður sem fann 730.000 sænskar krón­ur, and­virði rúm­lega 11 millj­óna íslenskra króna, á gang­stétt í sænska smá­bænum Berga í Kal­mar, má eiga alla pen­ing­ana. Hann hafði skilað pen­ing­unum til lög­reglu en eng­inn eig­andi gaf sig fram. Frá þessu er greint á The Local.

Krón­urnar 730.000 voru allar í sænskum seðlum sem voru inn­pakk­aðir í papp­ír. Mað­ur­inn fann pakk­ann í veg­brún í iðn­að­ar­hverfi í bænum þegar hann var í göngutúr fyrr í ár. Hann fór rak­leiðis með pen­ing­ana til lög­regl­unnar í Hels­ing­borg þar sem málið hefur verið til rann­sóknar en í Berga búa aðeins rúm­lega 700 manns.

Sam­kvæmt sænskum lögum á sá fund sem finn­ur, hafi lög­mætur eig­andi ekki gefið sig fram innan þriggja mán­aða. Lög­reglan í Hels­ing­borg til­kynnti svo í morgun að pen­ing­unum hafi verið skilað til hins nýja sam­visku­sama eig­anda.

„Við höfum fært manni á miðjum aldri 730.000 krónur í seðl­um. Seðl­arnir eru allir ófals­að­ir,“ sagði Ric­hard Glantz, tals­maður lög­regl­unnar við dag­blaðið Sydsvensk­an. Hann sagði málið jafn­framt mjög und­ar­legt og full­yrti að aldrei hefðu fund­ist svo háar fár­hæðir á víða­vangi.