Til­laga var borin upp á fram­kvæmda­stjórn­ar­fundi Sam­fylk­ing­ar­innar fyrir skemmstu um að flýta ætti lands­fundi flokksis svo hann geti kosið sér nýja for­ystu í alls­herj­ar­at­kvæða­greiðslu. Engin efn­is­leg nið­ur­staða varð um til­lög­una. Frá þessu er greint í Frétta­blað­inu í dag.

Þar er haft eftir Semu Erlu Serdar, for­manns fram­kvæmda­stjórn­ar ­Sam­fylk­ing­ar­inn­ar, að fram­kvæmda­stjórn hafi opnað umræðu um næsta lands­fund og hvenær hann verður hald­inn. Til standi að halda tvo stóra flokks­stjórn­ar­fundi næst­kom­andi haust þar sem málið verði rætt. "Það er alveg rétt að ákveðin öfl innan flokks­ins vilja nýjan lands­fund þar sem flokk­ur­inn í heild sinni getur valið sér nýja for­ystu. Hins vegar býr flokk­ur­inn yfir sínum lögum og reglum og nú er vinna hafin við það að meta hvaða leiðir eru færar í stöð­unn­i," segir Sema.

Nokkrir mán­uðir frá síð­asta lands­fundi

Síð­asti lands­fundur Sam­fylk­ing­ar­innar fór fram í mars síð­ast­liðn­um. Þar bauð Sig­ríður Ingi­björg Inga­dóttir sig fram til for­manns gegn sitj­andi for­manni, Árna Páli Árna­syni. Þar sem fram­boðið barst skömmu ­fyrir lands­fund gátu ein­ungis lands­full­trúar kosið í for­manns­kosn­ing­unum í stað þess að alls­herj­ar­at­kvæða­greiðsla færi fram sem allir flokks­menn gætu tekið þátt í. Nið­ur­staðan varð sú að Árni Páll sigr­aði með einu atkvæði, hlaut 241 atkvæði en Sig­ríður Ingi­björg 240.

Árni Páll tók við af Jóhönnu Sig­urð­ar­dóttur sem for­maður Sam­fylk­ing­ar­innar árið 2013. Árni Páll var kjör­inn í alls­herj­ar­kosn­ingu og hlaut afger­andi kosn­ingu í bar­átt­unni um for­manns­stól­inn við Guð­bjart Hann­es­son. ­Sam­fylk­ingin beið hins vegar afhroð í síð­ustu Alþing­is­kosn­ing­um, undir stjórn Árna Páls, þegar flokk­ur­inn hlaut 12,9 pró­sent atkvæða og tap­aði ell­efu þing­mönn­um. Aldrei nokkru sinni í sögu íslenskra stjórn­mála hefur einn flokkur tapað jafn miklu fylgi á milli kosn­inga og Sam­fylk­ingin gerði á milli áranna 2009 og 2013.

Fylgi Sam­fylk­ing­ar­innar mælist nú 11,6 pró­sent, eða minna en í síð­ustu kosn­ing­um. Og það hefur mælst stöðugt mjög lágt í öllum könn­unum sem gerðar hafa verið und­an­farna mán­uði.

Árni Páll mælist líka með mjög lítið per­sónu­fylgi í könn­unum og virð­ist ekki trekkja kjós­endur að flokkn­um. Í könnun MMR sem birt var í lok apríl sögðu til dæmis þrjú pró­sent aðspurðra að hann væri fæddur leið­togi. Engin stjórn­málafor­ingi mæld­ist lægri í þeim flokki. Sex pró­sent svar­enda taldi að Árni Páll skil­aði árangri.

Segir Sam­fylk­ing­una verða að bregð­ast við ástand­inu

Árni Páll var í við­tali við útvarps­þátt­inn Sprengisand um síð­ustu helgi. Þar sagði hann stöðu Sam­fylk­ing­ar­innar vera áfell­is­dóm yfir honum sjálfum og flokkn­um. Þró­unin hefði byrjað með stofnun Bjartrar fram­tíðar og haldið áfram. „Ef þú horfir á stöð­una eins og hún er í dag og horfir á hana frá 2012 þá er það í mínum huga áfell­is­dómur yfir Sam­fylk­ing­unni að hún skuli ekki hafa orðið vett­vangur fólks sem hefur viljað fara í mál­efna­lega nýsköpun á miðju íslenskra stjórn­mála. Fyrst í Bjartri fram­tíð og síðan í Píröt­u­m.“

Í þætt­inum sagði Árni Pál­l einnig að hann hefði áhuga á að sækja sér sterk­ari umboð sem for­maður í alls­herj­ar­kosn­ingu en að lög flokks­ins hamli honum að gera það. Þá sagði Árni Páll einnig að Sam­fylk­ingin yrði að bregð­ast við ástand­inu. „Sam­fylk­ingin verður að bregð­ast við því með því að verða sú fjölda­hreyf­ing sem hún var stofnuð til að vera. Hún verður að hætta að tala eins og gam­al­dags­flokk­ur, hún verður að hætta að vinna eins og gam­al­dags­flokkur og hún verður að leita sér fyr­ir­mynda í laus­beisl­uðum fjölda­hreyf­ingum út um allan heim.“