Ólafur Ragnar Gríms­son fyrr­ver­andi for­seti Íslands hélt ávarp við útgáfu­at­höfn í til­efni íslenskrar útgáfu bók­ar­innar Xi Jin­p­ing: Kín­versk stjórn­mál I sem fram fór í Hörpu á þriðju­dag. Við­burð­ur­inn var hald­inn á vegum kín­verska sendi­ráðs­ins á Íslandi og Alþjóð­legrar útgáfu­sam­steypu Kína.

Á vef kín­verska sendi­ráðs­ins á Íslandi og í for­síðu­um­fjöllun dag­blaðs­ins China Daily, sem er alþjóð­legt mál­gagn kín­verska stjórn­valda, er Ólafur Ragnar í ræðu sinni sagður hafa rifjað upp sam­skipti sín við Xi Jin­p­ing á fyrri árum og lýst því að hann hafi verið mjög hrif­inn af hug­myndum hans um stjórn­speki.

Á vef sendi­ráðs­ins er Ólafur Ragnar sagður hafa tjáð við­stöddum að hann hefði verið „im­pressed by Pres­ident Xi Jin­p­ing's philosophy of govern­ing the country“ og í frétt China Daily segir að Ólafur Ragnar hafi verið „deeply impressed by Xi's ideas on govern­ance“ en þessi ummæli eru ekki höfð eftir for­set­anum fyrr­ver­andi í beinni ræðu.

Þor­steinn Krist­ins­son dokt­or­snemi í stjórn­mála­fræði í Lundi í Sví­þjóð vakti athygli á þeim ummælum sem höfð eru eftir Ólafi Ragn­ari á for­síðu China Daily í færslu á Twitter í morg­un.

Hann beindi þeirri spurn­ingu til for­set­ans fyrr­ver­andi hvort þarna væri rétt eftir honum haft, að hann hefði lýst sig inni­lega hrif­inn af stjórn­speki Xi, „manns­ins sem er að færa Kína frá ein­ræði aftur til alræðis og hyggst skipa sjálfan sig leið­toga fyrir lífs­tíð“.

„Ansi skraut­legar ýkj­ur“

Kjarn­inn spurði Ólaf Ragnar að því sama, og segir hann í skrif­legu svari við fyr­ir­spurn blaða­manns að um sé að ræða „ansi skraut­legar ýkjur í Rík­is­frétta­stofu Kína“. Hann vís­aði svo til svars sem hann veitti Frétta­blað­inu í dag, þar sem hann meðal ann­ars sagði það út í hött að hann hafi verið að tala um stuðn­ing við stjórn­ar­far í Kína.

„Ég segi nú við þennan á­gæta mann sem hóf þessa um­ræðu á Twitter að vara sig á kín­versku rík­is­­frétta­­stof­unn­i,“ sagði Ólafur Ragnar við blað­ið.

Sam­kvæmt frétt China Daily sagði Ólafur Ragnar einnig í ávarpi sínu að hann fagn­aði útgáfu bókar Xi á íslensku, mik­il­vægt væri að fyrir þróun heims­ins að skilja Kína og að íslensk útgáfa bók­ar­inn­ar, sem er á vegum BF-­út­gáfu, myndi stuðla að sam­eig­in­legum skiln­ingi og vin­sam­legum tengslum á milli Kína og Íslands.

Á vef kín­verska sendi­ráðs­ins er haft eftir He Rulong sendi­herra Kína hér­lendis að útgáfa bók­ar­innar á íslensku beri vitni um mik­il­vægið sem Kína veiti tengslum sínum við Ísland og gagn­kvæmri vin­áttu. Bókin muni hjálpa íslenskum les­endum að skilja hugs­ana­gang Xi Jin­p­ing for­seta um hvernig skuli stýra Kína í átt til þjóð­legrar vel­sæld­ar.

Rit Xi hafa komið út á 37 tungu­málum

Bókin sem nú er komin út á íslensku er fyrsta ritið af fjórum í bóka­röð Xi Jin­p­ing, sem inni­heldur valdar ræður og skrif kín­verska for­set­ans. Bæk­urnar hans hafa nú verið þýddar á alls 37 tungu­mál og óhætt er að full­yrða að íslenska sé smæsta tungu­málið sem bók eftir Xi hefur verið gefin út á.

Bækur Xi hafa fengið mis­jafna dóma þeirra sem þær hafa les­ið, en ýmsum þykja þær þó veita gagn­lega inn­sýn í þanka­gang leið­tog­ans og voru meðal ann­ars fréttir sagðar af því að Mark Zucker­berg for­stjóri Meta (áður Face­book) hefði legið yfir bók­unum og pantað ein­tök fyrir starfs­menn fyr­ir­tæk­is­ins.

Það vakti svo nokkra athygli undir lok síð­asta árs er Reuters skýrði frá ástæð­unum fyrir því að Amazon hefði ákveðið að loka á stjörnu­gjöf alls varn­ings sem boð­inn er til sölu í kín­verskri útgáfu versl­un­ar­ris­ans.

Að sögn heim­ild­ar­manna Reuters voru nei­kvæðar umsagnir og stjörnu­gjafir um bók Xi ástæðan fyrir því að þetta var gert, að kröfu kín­verskra stjórn­valda. Allt undir fimm stjörnum var vanda­mál­ið, að sögn heim­ild­ar­manns Reuters sem þekkti til máls­ins hjá Amazon.

Fréttin var upp­færð með við­brögðum Ólafs Ragn­ars eftir að þau bár­ust