Fjöldi rúss­neskra banka hefur til­kynnt fyr­ir­hug­aða upp­töku greiðslu­korta frá kín­verska korta­fyr­ir­tæk­inu Union Pay, eftir að Visa og Mastercard til­kynntu að þau myndu stöðva öll við­skipti í Rúss­landi um helg­ina. Þetta kemur fram í fréttum Reuters.

Visa og Mastercard til­kynntu á laug­ar­dag­inn að kort á þeirra vegum sem væru ekki gefin út í Rúss­landi myndu ekki virka í land­inu innan fárra daga. Sömu­leiðis myndu kort sem hefðu verið gefin út í Rúss­landi ekki virka í öðrum lönd­um. Ástæða ákvörð­un­ar­innar er inn­rás Rússa í Úkra­ínu, en fram­kvæmda­stjóri Visa kall­aði atburði síð­ustu daga „óá­sætt­an­lega.“

Nú þegar hefur fjöldi rúss­neskra banka verið úti­lok­aður frá alþjóð­lega SWIFT-greiðslu­kerf­inu vegna inn­rás­ar­inn­ar, auk þess sem Paypal hefur stöðvað starf­semi sína í land­inu og eignir fjölda rúss­neskra auð­manna í Evr­ópu­löndum hafa verið fryst­ar. Í kjöl­far þess­ara aðgerða hefur virði rúss­neska gjald­mið­ils­ins, rúblunn­ar, hrun­ið, en það er nú fimmt­ungi lægra í Banda­ríkja­dölum heldur en fyrir inn­rás­ina.

Stærsti við­skipta­banki Rúss­lands, Sber­bank, hefur til­kynnt rúss­nesku við­skipta­vinum sínum að þeir geti enn tekið út pen­ing, milli­fært og keypt á inn­lendum net­versl­unum með kort­unum sín­um, þar sem ákvarð­anir Visa og Mastercard hafa ekki áhrif á inn­lenda greiðslu­kerf­ið.

Í gær til­kynnti svo Sber­bank, ásamt bönk­unum Alfa Bank og Tin­koff, að þeir hygð­ust stunda við­skipti við kín­verska korta­fyr­ir­tækið Union Pay í stað­inn fyrir Visa og Mastercard. Þessi kort yrðu svo tengd rúss­neska greiðslu­miðl­un­ar­kerf­inu, sem nefn­ist Mir.