Ný skoð­ana­könnun sýnir að þrír af hverjum fjórum kjós­endum af spænskum eða lat­neskum upp­runa líta Don­ald Trump, auð­kýf­ing­inn sem sæk­ist eftir því að verða for­seta­fram­bjóð­andi Repúblikana­flokks­ins, nei­kvæðum aug­um. Frá þessu er greint á vef NBC. Trump hefur verið á miklu skriði í skoð­ana­könn­unum að und­an­förnu og mælst lík­leg­astur allra þeirra sem sækj­ast eftir útnefn­ingu Repúblikana­flokks­ins til að hljóta hana. Hann hefur látið fjöl­mörg umdeild ummæli falla frá því að hann til­kynnti um fram­boð sitt og sér­stak­lega beint sjónum sínum að inn­flytj­endum frá Mexíkó. Hann hefur meðal ann­ars ásakað yfir­völd í Mexíkó um að senda glæpa­menn og nauð­gara til Banda­ríkj­anna.

Þrátt fyrir þetta hefur Trump haldið því fram að hann njóti mik­ils stuðn­ings í sam­fé­lagi þeirra sem eru af spænskum eða lat­neskum upp­runa í Banda­ríkj­un­um. Könn­un­in, sem var gerð fyrir NBC, Wall Street Journal og Tel­e­mundo, gefur hins vegar hið þver­öf­uga til kynna. Þar sögð­ust 75 pró­sent þeirra 250 af þeim upp­runa sem spurðir voru um álit sitt á Trump hafa nei­kvætt álit á hon­um. Þar af sögð­ust 61 pró­sent hafa mjög nei­kvætt álit á hon­um.

Rúm­lega helm­ingur þeirra sem spurðir voru álits á Trump í könn­un­inni sögðu að ummæli hans um Mexík­ana væru móðg­andi kyn­þátt­ar­níð sem ætti ekki heima í bar­átt­unni fyrir útnefn­ingu á for­seta­fram­bjóð­anda flokks. Þá sögð­ust 69 pró­sent aðspurðra að Trump væri að skaða ímynd Repúblikana­flokks­ins með yfir­lýs­ingum sínum og hegð­un.