Fjár­tækni­fyr­ir­tækið Rapyd hefur samið um kaup á Valitor hf. fyrir 100 millj­ónir Banda­ríkja­dala, eða 12,3 millj­örðum íslenskra króna. Þetta kemur fram í til­kynn­ingu sem birt­ist á vef Keld­unnar fyrr í dag.

Sam­kvæmt til­kynn­ing­unni er gert ráð fyrir því að kaupin klárist í lok þessa árs, en enn á eftir að fá sam­þykki eft­ir­lits­að­ila fyrir þeim.

Valitor, sem er greiðslu­miðl­un­ar­fyr­ir­tæki í eigu Arion banka, hefur verið til sölu frá árinu 2018. Sam­kvæmt árs­reikn­ingum bank­ans hefur það skilað millj­arða­tapi frá þeim tíma, en sam­an­lagt tap þess árin 2018, 2019 og 2020 nam 13 millj­örðum króna.

Í síð­asta árs­reikn­ingi Arion banka segir að Valitor hafi ráð­ist í umfangs­mikla end­ur­skipu­lagn­ingu og hag­ræð­ing­ar­að­gerðir í fyrra, auk þess sem starf­semi félags­ins í Dan­mörku og hluti starf­sem­innar í Bret­landi hafi verið seld. „Áfram er Valitor í sölu­ferli en það hefur tekið lengri tíma en upp­haf­lega var gert ráð fyr­ir, m.a. vegna breyttra mark­aðs­að­stæðna tengdum Covid-19. Þrátt fyrir þessa seinkun finnur bank­inn áhuga frá ýmsum aðilum á kaupum á Valitor.“

Arion gerir nú ráð fyrir að færa til tekna rúm­lega 3,5 millj­arða í sölu­hagnað og áætlar að umfram eigið fé hækki um 8 til 11 millj­arða króna. Sam­kvæmt sölu­til­kynn­ing­unni munu við­skipta­vinir Valitor ekki verða fyrir neinni röskun á þjón­ustu vegna kaupanna og eiga brátt að hafa aðgang að greiðslu­leiðum og fjár­tækni­þjón­ustu Rapyd.