Það gengur allt á afturfótunum hjá Samsung þessi dægrin eftir að rafhlöður Galaxy Note 7-símanna fóru að springa í höndunum á fólki. Nú hafa umferðaryfirvöld í New York beint þeim tilmælum til almennings að fara ekki með símana í neðanjarðarlestarkerfið. Þetta er ekki formlegt bann en nokkuð víst að maður verði litinn hornauga ef hann sést með sprengjusíma um borð í lestinni.
Samsung hyggist senda út hugbúnaðaruppfærslu til eigenda Note 7-símanna sem á að vera einskonar skyndilausn á vandamálinu, fyrir þá sem geta ekki skilað símunum sínum strax. Lausnin felur í sér að rafhlaðan hleðst aldrei meira en upp í 60 prósent. Það á að koma í veg fyrir ofhitnunina sem veldur því að rafhlaðan springi.
Í Tæknivarpinu er rætt um sprengjusímana frá Samsung, aðalkeppinautinn Apple og heyrnatólausa iPhone-símann. Umsjónarmenn þáttarins eru Gunnlaugur Reynir Sverrisson, Jón Heiðar Þorsteinsson og Heiðar Smári Marinósson.
Heiðar Smári er sér um samfélagsmiðla hjá The Engine sem stendur fyrir ráðstefnu með Google í Hörpu 23. september næstkomandi. Á ráðstefnunni verður einblínt á markaðssetningu íslenskra ferðaþjónustufyrirtækja á netinu.