Lofts­lagsráðstefnan í París hefur verið kölluð mik­ilvægasti fundur ald­ar­inn­ar. Ástæðan er sú að lofts­lags­breyt­ingar af manna völdum ógna framtíð mann­kyns og ef ekki verður gripið til aðgerða nú kann að vera of seint að gera neitt til að snúa þróuninni við.

Markmið fund­ar­ins var að ríki heims­ins kæmu sér saman um að hlýnun yrði innan við tvær gráður, helst ekki meira en ein og hálf gráða en slík hlýnun mun t.d. hafa það í för með sér að mörg eyríki í Kyrra­haf­inu munu hverfa undir haf og íbúar þeirra munu þurfa að taka sig upp með manni og mús og finna sér annað stað á jörðinni.

Á fund­inum virt­ust nánast allir sammála um að það yrði að ná ein­hverju slíku markmiði en ekki endi­lega um hvað þyrfti að gera til að ná því. Ríki heims eru enn að veita opin­bert fé til að fram­leiða óend­urnýjan­lega orku­gjafa, s.s. olíu, kol og gas. Raunar er opin­ber stuðningur við óend­urnýjan­lega orku­gjafa tals­vert meiri en við end­urnýjan­lega orku­gjafa sem er þvert á öll opin­ber markmið. Þannig virðast stundum orð og gjörðir ekki fara saman enda eru ríkir hags­munir sem toga í ólíkar áttir.

Í París var deilt um fjármuni, hve miklu ætti að vera til að styrkja þróunarlöndin til að draga úr los­un, breyta atvinnu­upp­bygg­ingu og orku­notk­un, rækta land og skóg. Álitamál var hve þétt ætti að uppfæra markmið samlomu­lags­ins, hvort það ætti að vera á fimm ára fresti eða sjaldn­ar. Enn­fremur var deilt um það fjármagn sem þyrfti til að laga sig að þeim lofts­lags­breyt­ingum sem munu verða. Síðast en ekki síst var deilt um það hvort þróunarlöndin skulda eyríkjunum sem að öllum líkindum munu sökkva í sæ vegna lofts­lags­breyt­inga af manna völdum sann­girn­isbætur.

Sam­komu­lag í París mun ekki breyta neinu sjálfkrafa. Það mun hins vegar gefa okkur sam­eig­in­legan skiln­ing á því hvaða aðgerða er þörf og gefa okkur öllum; stjórnmálamönnum, embættismönnum, almenn­ingi og fyr­irtækjum, tæki til að fylgj­ast með því að unnið verði að þeim aðgerðum, von­andi með eins gagnsæjum og lýðræðislegum hætti eins og unnt er.

Það er okkar sannfæring að stjórnmálamenn úr ólíkum áttum eigi að taka höndum saman um þetta verk­efni og vinna að heil­indum af því að sporna gegn frek­ari lofts­lags­breyt­ingum og tryggja þannig fólki um heim allan mannsæmandi lífsskilyrði til langrar framtíðar. Það er ábyrgð okkar gagn­vart kom­andi kynslóðum.

Birgitta Jónsdóttir, Höskuldur Þórhalls­son, Katrín Jak­obsdóttir, Ragn­heiður Ríkharðsdóttir, Róbert Mars­hall og Val­gerður Bjarnadóttir.

Höfundar voru fulltrúar Alþingis á lofts­lagsráðstefn­unni í París.