1. Wintris-málið er líkast til stærsta frétt Panamaskjalananna allra. Í því var opinberað að Sigmundur Davíð Gunnlaugsson, þá forsætisráðherra Íslands, hefði ásamt eiginkonu sinni átt aflandsfélagið Wintris sem er með heimilisfesti í skattaskjólinu Tortóla á Bresku Jómfrúareyjunum. Sigmundur Davíð hefur ekki viljað upplýsa um hvaða eignir séu í félaginu en gefið hefur verið út að virði þeirra sé á annan milljarð króna. Wintris var auk þess kröfuhafi í bú föllnu íslensku bankanna, sem ríkisstjórn Sigmundar Davíðs samdi um að hleypa út úr íslensku hagkerfi á árinu 2015.
Sigmundur Davíð sagði ekki samherjum innan Framsóknarflokks, samstarfsflokknum Sjálfstæðisflokki eða almenningi frá því að hann hefði átt þessar eignir né að hann hefði verið kröfuhafi í bú bankanna. Þegar tilvist Wintris var borin upp á Sigmund Davíð í viðtali sem birt var 3. apríl, og var sýnt út um allan heim, laug hann, neitaði síðan að svara frekari spurningum og rauk út úr viðtalinu. Wintris-málið leiddi til þess að Sigmundur Davíð þurfti að segja af sér embætti forsætisráðherra Íslands 5. apríl 2016.
2. Í Panamaskjölunum var að finna upplýsingar um félagið Guru Invest, sem skráð er í eigu Ingibjargar Pálmadóttur, og hefur fjármagnað fjölmörg verkefni í Bretlandi og á Íslandi eftir hrun. Jón Ásgeir Jóhannesson, eiginmaður hennar, var skráður með prókúru í félaginu og tengist mörgum verkefnanna sem það hefur fjármagnað.
Í skjölunum kom einnig fram félagið kom að því að greiða 2,4 milljarða króna skuld tveggja félaga í eigu fjölskyldu Jóns Ásgeirs á árinu 2010. Skuldin var greidd í reiðufé og með skuldabréfum útgefnum af Íbúðalánasjóði. Í skuldauppgjörinu fékk Guru Invest heimild frá Seðlabankanum til að nota skuldabréfin til að greiða upp skuldina.
Seðlabanki Íslands hefur ekki viljað svara því af hverju félag frá Panama fékk leyfi til að nota innlendar eignir í skuldauppgjöri með þessum hætti þegar aðrir erlendir eigendur íslenskra eigna sátu fastir innan hafta með þær, né hvort að dæmi séu um að aðrir erlendir eigendur skuldabréfa útgefnum af Íbúðarlánasjóði hafi fengið að nota þau með sama hætti.
3. Bræðurnir Ágúst og Lýður Guðmundssynir, sem oftast eru kenndir við Bakkavör, áttu að minnsta kosti sex félög sem skráð eru til heimilis á Bresku Jómfrúareyjunum. Eitt þeirra félaga var á meðal kröfuhafa í bú Kaupþings. Félagið, New Ortland II Equities Ltd., gerði samtals kröfu upp á 2,9 milljarða króna í búið. Um var að ræða skaðabótakröfu. Samkvæmt upplýsingum frá Kaupþingi ehf., sem stofnað er á grunni slitabús Kaupþings, var skaðabótakröfunni hafnað með endanlegum hætti við slitameðferð Kaupþings. Bræðurnir voru stærstu einstöku eigendur Kaupþings fyrir fall bankans í gegnum fjárfestingarfélagið Exista.
Bjarnfreður Ólafsson, lögmaður þeirra, sat í stjórn bankans fyrir þeirra hönd og félög bræðranna voru á meðal stærstu skuldara Kaupþings. Samkvæmt skýrslu rannsóknarnefndar Alþingis skuldaði Exista og tengd félög Kaupþingi, sem breyttist í Arion banka við kennitöluflakk í hruninu, 239 milljarða króna. Eitthvað hefur fengist upp í þær kröfur vegna nauðasamninga Existu og Bakkavarar, og sölu á hlut í Bakkavör, en ljóst er að sú upphæð er fjarri þeirri fjárhæð sem Kaupþing lánaði samstæðunni.
Það átti ekki að koma mörgum á óvart að Ágúst og Lýður ættu mikla fjármuni erlendis. Fyrir hrun var hollenskt félag í þeirra eigu, Bakkabræður Holding B.V., aðaleigandi fjárfestingafélagsins Existu sem hélt meðal annars á eignarhlut þeirra í Bakkavör auk þess að vera stærsti eigandi Kaupþings. Í skýrslu rannsóknarnefndar Alþingis kom fram að það félag hefði verið á meðal þeirra aðila sem þáðu hæstar arðgreiðslur á uppgangsárunum fyrir hrun. Alls fékk félagið tæpa níu milljarða króna í arðgreiðslur á árunum 2005 til 2007.
4. Skjölin sýndu að Bjarni Benediktsson, formaður Sjálfstæðisflokksins og fjármála- og efnahagsráðherra, hefði átt þriðjungshlut í félaginu Falson&Co. sem skráð var á Seychelles-eyjum. Þær eyjar eru þekkt skattaskjól. Bjarni átti hlut í félaginu vegna fasteignaviðskipta í Dubai sem hann tók þátt í árið 2006. Falson-hópurinn gekk út úr viðskiptunum árið 2008 og ári seinna var félagið gert upp með tapi og Falson sett í afskráningarferli.
Bjarni hafði verið spurður að því í Kastljósi 11. febrúar 2015 hvort hann hafi ekki átt eignir eða viðskipti í skattaskjólum. Bjarni neitaði því en sagði síðar að hann hafi talið Falson vera skráð í Lúxemborg og því hafi svör hans verið gefin eftir bestu vitund. Síðar birti Bjarni skattaupplýsingar sínar og sagði við það tækifæri að honum fyndist „bæði eðlilegt og skiljanlegt að gerðar séu miklar kröfur til forystumanna í stjórnmálum. Hér fylgir því jafnframt yfirlit yfir allar skattskyldar tekjur þau ár sem ég hef gegnt ráðherraembætti.“
Staða Bjarna var samt sem áður í lausu lofti í byrjun apríl, eftir að fyrstu fréttir úr Panamaskjölunum voru sagðar. Í könnun Félagsvísindastofnunar, sem gerð var í byrjun apríl 2016, kom fram að 60 prósent landsmanna vildu að Bjarni segði af sér ráðherraembætti vegna aflandsfélagaeignar sinnar.
5. Bjarni var ekki eini forystumaður Sjálfstæðisflokksins sem var í Panamaskjölunum. Þar var einnig að finna upplýsingar um aflandsfélagatengsl Ólafar Nordal, varaformanns flokksins og innanríkisráðherra. Hún og eiginmaður hennar, Tómas Sigurðsson, þáverandi forstjóri Alcoa á Íslandi, voru skráð sem prófkúruhafar Dooley Securities á Tortóla-eyju tveimur dögum eftir að hún tók þátt í prófkjöri flokks síns árið 2006. 
Tilgangur félagsins var að halda utan um ætlaðan ávinning af kauprétti eiginmanns hennar. Til þess kom aldrei að Tómas nýtt félagið undir kauprétti sína, og því var Dooley aldrei notað. Ólöf taldi að félaginu hefði verið slitið 2008 en það var ekki afskráð fyrr en 2012. Ólöf skráði aðild sína að Dooley aldrei í hagsmunaskrá þingmanna.
6. Þá var Júlíus Vífill Ingvarsson, borgarfulltrúi Sjálfstæðisflokksins, til umfjöllunar vegna vörslusjóðs sem hann á í Panama. Júlíus gaf út yfirlýsingu vegna málsins þar sem hann sagði að sjóðurinn hafi verið stofnaður í svissneskum banka til að mynda eftirlaunasjóðinn sinn, en að honum hafi verið ráðlagt að skrá stofnun hans í Panama. Sjóðurinn lúti svipuðu regluverki og sjálfseignarstofnun. Aflandsfélagið heitir Silwood Foundation. Júlíus Vífill sagði af sér sem borgarfulltrúi í kjölfarið.
Í maí greindu tvö systkin Júlíusar Vífils frá því að hann hefði viðurkennt fyrir þeim að í aflandsfélagi hans í Panama hafi verið peningar upprunnir frá foreldrum þeirra. Peninganna hafði móðir þeirra ásamt hluta fjölskyldunnar leitað í rúman áratug. Um var að ræða sjóð í erlendum banka sem faðir þeirra, Ingvar Helgason, hafði safnað umboðslaunum frá erlendum bílaframleiðendum inn á alla tíð. Júlíus Vífill hefur sjálfur sagt að ásakanir systkina hans væru algjör ósannindi og ómerkileg illmælgi. Sveinbjörg Birna Sveinbjörnsdóttir, borgarfulltrúi Framsóknar og flugvallavina, var einnig til umfjöllunar. Sveinbjörg átti hlutdeild í aflandsfélagi sem var í fasteignaþróunarverkefni í Panama.
7. Í gögnum Mossack Fonseca var einnig að finna upplýsingar um félag í eigu fjölskyldu Dorritar Moussaieff, eiginkonu Ólafs Ragnars Grímssonar, þáverandi forseta Íslands, sem skráð var á Bresku Jómfrúareyjunum frá árinu 1999 til ársins 2005. Félagið Lasca Finance Limited. Árið 2005 seldi fjölskyldufyrirtækið Moussaieff Jewellers Ltd. tíu prósenta hlut sinn í Lasca Finance til hinna tveggja eigenda þess. Þeir voru S. Moussaieff og „Mrs." Moussaieff.
Kjarninn og Reykjavík Grapevine opinberuðu þetta 25. apríl 2016. Nokkrum dögum áður hafði Ólafur Ragnar farið í viðtal til Christiane Amanpour á bandarísku sjónvarpsstöðinni CNN. Amanpour spurði Ólaf Ragnar um Panamaskjölin og hreint út hvort hann eða fjölskylda hans væri tengd aflandsfélögum: „Átt þú einhverja aflandsreikninga? Á eiginkona þín einhverja aflandsreikninga? Á eitthvað eftir að koma í ljós varðandi þig og fjölskyldu þína?” spurði hún. Ólafur var afdráttarlaus í svörum: „Nei, nei, nei, nei, nei. Það verður ekki þannig.”
Síðar var greint frá því að Dorrit hafi tengst minnst fimm bankareikningum í Sviss í gegnum fjölskyldu sína og að minnsta kosti tveim aflandsfélögum. Hún var auk þess skráð án lögheimilis eða heimilisfestu í Bretlandi vegna skattamála.
8. Félög í eigu Finns Ingólfssonar, Helga S. Guðmundssonar og Hrólfs Ölvissonar voru á meðal þeirra sem fundust í Panamaskjölunum sem lekið var frá Mossack Fonseca. Félag Finns og Helga, sem skráð var í Panama, keypti meðal annars hlut í Landsbankanum á árinu 2007 með láni frá bankanum sjálfum.
Mennirnir þrír hafa allir verið áhrifamenn innan Framsóknarflokksins á undanförnum áratugum og Hrólfur var framkvæmdastjóri flokksins þegar lekinn var gerður opinber. Hann sagði af sér því starfi í lok apríl vegna umfjöllunar um aflandsfélagaeign hans.
9. Aflandsfélagaeign var ekki bara bundin við fólk með pólitísk tengsl eða umsvifamikla viðskiptajöfra. Félög í eigu tveggja framkvæmdastjóra íslenskra lífeyrissjóða var einnig að finna í skjölum Mossack Fonseca.
Um var að ræða Kára Arnór Kárason, þá framkvæmdastjóri Stapa - lífeyrissjóðs, og þá framkvæmdastjóra Sameinaða lífeyrissjóðsins, Kristján Örn Sigurðsson. Kári Arnór sagði starfi sínu lausu eftir að Kastljós spurði hann spurninga vegna Panamaskjalanna. Kristján Örn gerði slíkt hið sama nokkrum dögum síðar.
10. Þá kom fram í gögnunum að Vilhjálmur Þorsteinsson, fjárfestir, fyrrverandi gjaldkeri Samfylkingarinnar og hluthafi í Kjarnanum hafi átt félag sem skráð var til heimilis á Bresku Jómfrúareyjunum. Félagið, sem hét M-Trade, var stofnað árið 2001 en formlega afskráð árið 2012. Það fjárfesti m.a. í afleiðuviðskiptum og var í eignastýringu hjá Kaupþingi í Lúxemborg. Nafn félagsins M-Trade kom fyrir í skjölum sem lekið var frá Mossack Fonseca. Nafn Vilhjálms sjálfs er þó ekki í skjölunum.
