Frá því fyrsta smitið af kór­ónu­veirunni var greint hér á landi þann 28. febr­úar hafa 3.079 greinst með COVID-19, yfir 140 verið lagðir inn á sjúkra­hús og tíu lát­ist. Í gær greindust 99 smit inn­an­lands sem er mesti fjöldi á einum sól­ar­hring frá því þriðja bylgja far­ald­urs­ins hófst um miðjan sept­em­ber.  Fjórir liggja nú á gjör­gæslu­deild Land­spít­al­ans vegna sjúk­dóms­ins.

221 dagur er lið­inn frá því að COVID-19 greind­ist í fyrsta sinn hér á landi. Og  195 dagar eru síðan met­fjöldi nýrra smita greind­ist: 106 til­felli af COVID-19 greindust á einum sól­ar­hring. Fjöld­inn fór aldrei aftur yfir 100 í fyrstu bylgju far­ald­urs­ins. Flest urðu þau 99 eftir þetta og það gerð­ist þann 1. apr­íl.

„Við erum ekk­ert að grín­ast með þetta,“ hafði Víðir Reyn­is­son yfir­lög­reglu­þjónn almanna­varna sagt nokkrum dögum fyrr. Á dag­legum upp­lýs­inga­fundum var hamrað á sömu skila­boð­un­um: Sam­staðan ein mun skila árangri. Allir verða að gæta að sér, þvo sér vel um hendur og spritta og halda tveggja metra fjar­lægð við næsta mann.

Upp­lýs­inga­fund­irnir eru ekki eins tíðir í dag. Þeir eru nú yfir­leitt tvisvar sinnum í viku. Á þá mætir þrí­eykið enn og flytur okkur sömu skila­boð: Gætið að ykk­ur. Við verðum að standa sam­an.

Ým­is­legt hefur breyst frá fyrstu bylgj­unni. Sótt­kví hefur verið stytt, hún er ekki lengur fjórtán dagar heldur lýkur eftir sjö daga með sýna­töku. Fólk er líka almennt styttri tíma í ein­angrun enda stöðugt verið að afla nýrrar þekk­ingar um sjúk­dóm­inn. Fleiri sýni eru tekin nú en í fyrstu bylgj­unni og 1 metra regla hefur tekið við af tveggja metra regl­unni.

En að sama skapi erum við komin á svip­aðar slóðir að mörgu leyti. Sam­komur hafa aftur verið tak­mark­aðar við 20 manns. Háskóla- og fram­halds­skóla­nemar sitja flestir við tölvur sínar heima í stað þess að mæta í bygg­ingar skóla sinna. Hús­næði lík­ams­rækt­ar­stöðva eru lokuð og sótt­varna­læknir hvetur fólk til að vinna heima. Und­an­þágur frá sam­komu­tak­mörk­unum hafa verið veittar þjóð­hags­lega mik­il­vægum fyr­ir­tækj­um, svo sem mat­væla­fyr­ir­tækj­um.

Í fyrstu bylgju far­ald­urs­ins greindust 1.810 með kór­ónu­veiruna. Í þriðju bylgj­unni, sem hófst að mati vís­inda­fólks við Háskóla Íslands þann 11. sept­em­ber, eða á 25 dögum hafa 879 greinst. Það er 223 færri en á jafn mörgum dögum í upp­hafi fyrstu bylgj­unn­ar.

„Þetta er allt öðru­vísi en í vor,“ sagði Þórólfur Guðna­son sótt­varna­læknir í gær. Hann tekur undir með Thor Aspelund líf­töl­fræð­ingi sem sagði í við­tali við Kjarn­ann í síð­ustu viku að þriðja bylgjan væri óút­reikn­an­legri en sú fyrsta. Erf­ið­ara sé að ná utan um far­ald­ur­inn nú en þá. „Það er við­búið að það muni ekki takast að keyra veiruna jafn mikið niður og okkur tókst í vor vegna þess að veiran hefur náð að grafa sig meira niður í sam­fé­lag­inu. Þetta er allt öðru­vísi en þetta var í vor.“