Sepp Blatter, fráfarandi forseti Alþjóðaknattspyrnusambandsins FIFA, og Michel Platini, forseti knattspyrnusambands Evrópu (UEFA), hafa báðir verið úrskurðaðir í átta ára bann frá knattspyrnu af siðanefnd FIFA. Blatter tilkynnti í sumar að hann myndi hætta sem forseti FIFA snemma á næsta ári. Afsögn hans kom í kjölfar röð hneykslismála innan sambandsins og ákæru bandarískra yfirvalda gegn níu háttsettum aðilum innan þess í maí síðastliðnum. Platini var talinn líklegastur til þess að taka við af Blatter og naut stuðnings flestra evrópskra ríkja til þess.
Í september var hins vegar greitt frá því að Blatter hefði greitt Platini um 1,3 milljónir punda nokkrum vikum áður en Platini dró framboð sitt til baka í forsetakosningum FIFA árið 2011. Saksóknarar töldu að Blatter hefði persónulega veitt heimild fyrir millifærslunni af reikningum FIFA til Platini. Upphæðin jafngildir rúmlega 250 milljónum króna. Platini sagði í yfirlýsingu að greiðslan hafi komið til vegna ráðgjafastarfa hans fyrir FIFA á árunum 1999 til 2002. Óljóst er hvers vegna greiðslan barst níu árum síðar, árið 2011. Hvorugur mannanna hefur getað sýnt fram á tilveru skriflegs samnings sem útskýrir greiðsluna en báðir neituðu sök.
Blatter mætti sjálfur fyrir siðanefnd FIFA á fimmtudag til að verja sig og í bréfi sem hann sendi til allra 209 meðlima FIFA líkti hann ferlinu við spænska rannsóknarréttinn. Platini neitaði hins vegar að koma fyrir nefndina í eigin persónu og lét lögmenn sína um það. Hann hefur ásakað siðanefndina um að taka þátt í pólitískum hvötum sem hafi það eina markmið að koma í veg fyrir að hann verði næsti forseti FIFA.
Niðurstaða siðanefndarinnar gerir það að verkum að tíma Blatter sem leiðandi afls í alþjóðaknattspyrnuheiminum er lokið, en hann er 79 ára gamall. Ljóst er að fall Platini er einnig mikið og í besta falli langt þangað til að hann lætur aftur að sér kveða á þessum. vettvangi.
