For­stjóri Icelandair Group segir að stefnt sé að því að ljúka samn­ingum við fimmtán lán­ar­drottna félags­ins fyrir lok vik­unn­ar. Enn sé stefnt að því að ljúka hluta­fjár­út­boði í næsta mán­uði.

Bogi Nils Boga­son, for­stjóri Icelandair Group, segir að sam­þykkt kjara­samn­ings við flug­freyjur sé mik­il­vægur liður í end­ur­skipu­lagn­ingu félags­ins. Hann segir enn stefnt að því að ljúka samn­ingum við fimmtán lán­ar­drottna fyrir lok vik­unn­ar. Mark­miðið sé enn það að ljúka samn­ingum við helstu hags­muna­að­ila, leigu­sala og fleiri áður en júlí­mán­uður er úti.  Þá sé stefnt að því að að ljúka fyr­ir­hug­uðu hluta­fjár­út­boði í ágúst. 

Þetta kemur fram í við­tali við Boga Nils í Morg­un­blað­inu í dag.

Icelandair tap­aði 331 milljón dala á fyrstu sex mán­uðum árs­ins sem sam­svarar tæpum 45 millj­örðum króna á gengi dags­ins í dag. Tapið er að stórum hluta rakið til kór­ónu­veiru­far­ald­urs­ins.

Á öðrum árs­fjórð­ungi, sem er tíma­bilið apr­íl-júní, dróst fram­boð á far­þega­flugi saman um 97 pró­sent og far­þegum fækk­aði um 98 pró­sent, segir í upp­gjöri félags­ins. Eigið fé þess nam 151,2 millj­örðum króna í lok júní og var eig­in­fjár­hlut­fall félags­ins ell­efu pró­sent. Þá nam lausa­fjár­staða félags­ins 21,3 milj­örðum króna í lok júní eða 152,5 millj­ónum dala.