„Við verðum að berj­ast. Við verðum að halda áfram og við vitum það. Við þekkjum líf­ið, við erum lífs­reyndar mann­eskjur og við gef­umst ekki upp svo gletti­lega – en það tekur í.“

Þetta sagði Þór­unn Svein­björns­dótt­ir, for­maður Lands­sam­bands eldri borg­ara, á fundi almanna­varna í morg­un.

Alls greindust 29 smit inn­an­lands í gær, þar af voru 20 í sótt­kví eða 71 pró­sent. Á landa­mær­unum greindust 9 smit.

Áfallið á Landa­koti náði til eldra fólks

„Mig langar sér­stak­lega að tala til ykkar sem eldri eru. Þetta haust ætlar að reyn­ast okkur tölu­vert erfitt og þess vegna skiptir máli að fá að koma og hvetja ykkur til dáða og um sam­heldn­ina sem skiptir öllu máli.

Þessi hluti veirunnar ætlar að vera okkur líka mun erf­ið­ari. Það eru núna yfir 209 sem eru yfir 60 ára aldri – það er mun hærra en það var í vor sem segir okkur að áfallið á Landa­koti hefur náð veru­lega til eldra fólks,“ sagði Þór­unn. 

Hún benti á að margt væri hægt að gera til að létta lífið þessa dag­ana. „Það eru biðraðir í mörgum búð­um. Þið þurfið að hugsa fyr­ir­fram. Fara helst snemma í mat­vöru­verslun og panta jafn­vel vörur á net­in­u.“

Þekkja tím­ana tvenna

Þór­unn skor­aði jafn­framt á eldra fólk að geyma þau erindi sem ekki skipta máli í bili. „Bara salta þau á blaði og eiga þau til góða þegar við förum að mega hreyfa okkur aðeins meira. En við megum ekki gleyma að fara út. Við megum ekki gleyma að fara og hreyfa okk­ur. Það skiptir alveg höf­uð­máli.“

„Þessi stóri hóp­ur, þessi 45.000 manna hópur rúm­lega, sem er yfir sex­tugt, er sterkur hópur og dug­leg­ur. Hann er ótrú­lega seigur og hann skiptir höf­uð­máli í okkar sam­fé­lagi.

Og við þekkjum tím­ana tvenna. Margt af okkar fólki lifði af og lifði í krepp­unni '30 og '31. Margir muna skömmt­un­ar­seðla. Þegar ég var barn man ég eftir skömmt­un­ar­seðlum og ég man að mamma beið í bið­röð eftir að kaupa kjólefni. Við erum ekki í neinu slíku, þrátt fyrir kreppu. Við þurfum þess vegna að vera sterk og við verðum sterk – og ég ætl­ast til þess að fjöl­skyldur standi saman og hlúi að sínu fólki.“

Hægt að gera krafta­verk í að rjúfa ein­mana­leika með því að vera virk í að hjálpa öðrum

Þór­unn kall­aði eftir fleiri síma­vinum en hún sagði á fund­inum að þeir væru að gera ótrú­lega fína hluti. „Við getum gert krafta­verk í að rjúfa ein­mana­leika með því að vera virk í að hjálpa öðr­um. Ég held að við þurfum að bretta upp ermar og fara í þetta. Það er gef­andi að vera sjálf­boða­lið­i.“

Hún hvatti fólk líka til að forð­ast leið­in­legar frétt­ir, sér­stak­lega fyrir svefn­inn. „Það er gott að fara í hug­leiðslu og reyna að anda djúpt,“ sagði hún. „Já­kvæðnin kemur okkur yfir þetta fram yfir miðjan nóv­em­ber og þá tök­umst við á við hvað kemur næst. Við ætlum að vera sterk og leysa þetta sam­an.“